इटहरी/ पारिवारिक कथावस्तुमा आधारित फिल्म ‘कार्साङ’को प्रदर्शन मिति नजिकिँदै गर्दा निर्माणपक्षले प्रचारप्रसारलाई मद्धत पुर्याउने हेतुले ‘सात भन्ज्याङ’ बोलको गीत सार्वजनिक गरेको छ । दयाहाङ राई र सिर्जना निङलेखुको प्रेमिल अभिनय रहेको यो गीत डीपी खनालको शब्द, एसडी योगीको संगीत र एडी योडी तथा रेश्मा पुन मगरको स्वरले सजिएको छ । गीतको एरेन्ज रिकेश गुरुङले गरेका हुन् ।
सार्वजनिक गीतमा प्रेम र त्यससँग जोडिएका सम्झनाका भावनाहरूलाई जीवन्त रूपमा प्रस्तुत गरिएको छ । दयाहाङ र सिर्जनाबीचको प्रेमको कथालाई टिपिकल शब्द र भेषभूषासहितको सांस्कृतिक पृष्ठभूमिमा देखाइएको छ । पूर्वी नेपालको शेर्पा र राई समुदायको कला र संस्कृति झल्काउँदै ग्रामीण परिवेशको सौन्दर्यलाई गीतले चित्रण गरेको छ । हेर्नुस् भिडियो ।
यम शेर्पाको डेब्यु निर्देशनमा बनेको यो फिल्म शेर्पा समुदायको कला, संस्कृति र जीवनशैलीलाई केन्द्रमा राख्दै अभाव र गरिबीको कथालाई चित्रण गर्न तयार भएको छ । ग्रामीण परिवेशमा आधारित ‘कार्साङ’ले दर्शकलाई शेर्पा समुदायको वास्तविक जीवन अनुभव गराउने उद्देश्य लिएको छ ।
दयाहाङ र सिर्जनाका साथै फिल्ममा जितु नेपाल, दीया मास्के, बुद्धि तामाङ, सृष्टि गौतम, डोमा ह्योल्मो, प्रेम लोप्चन र सुरवीर पण्डितलगायतका कलाकारको समेत अभिनय रहेको छ । यो सिर्जना निङलेखुको डेब्यु फिल्म हो । यो फिल्मलाई लिएर उनी निकै उत्साहित सँगै यसमा आफूले अभिनय राम्रो गरेकोमा सतप्रतिशत कन्फिडेन्ट छिन् ।
यार्सा फिल्म्स र पुरुषोत्तम प्रधान फिल्म्सको प्रस्तुतिमा निर्माण भएको फिल्मका निर्माता तथा छायांकार पुरुषोत्तम प्रधान हुन् । यो फिल्मको सह-निर्मातामा गोविन्द बोहरा र कार्यकारी निर्मातामा आङछिरिङ शेर्पा रहेका छन् । ग्रामीण कथा र सांस्कृतिक प्रस्तुतीकरणका कारण ‘कार्साङ’ले दर्शकको मन जित्ने विश्वास निर्माणपक्षले लिएको छ ।
Discussion about this post