इटहरी/ नेपाली समाजका जरा गाडेका कुप्रथा र विभेदविरुद्धको आवाज बोकेको फिल्म ‘जुना’ आगामी माघ २५ गतेदेखि प्रदर्शनमा आउने भएको छ । यो फिल्मले यसअघि विभिन्न ठाउमा आयोजना गरेको विशेष शोमा बालबालिकादेखी वृद्धबृद्धा तथा युवासम्मको मन छोएको थियो । केही ठाउँबाट बालबालिका यो फिल्म हेरेपछि बेहोससम्म भएको खबरहरु सार्वजनिक भएका थिए । बाल विवाह, महिला हिंसा र अन्य सामाजिक अपराधलाई निरुत्साहित गर्ने उद्देश्यले निर्माण गरिएको यो फिल्म जीवन सेञ्चुरीको निर्देशनमा तयार भएको हो ।
गोदावरी फिल्म प्रोडक्सन एण्ड रिसर्च सेन्टर प्रालिको ब्यानरमा बनेको यस फिल्ममा अस्मिता ढकाल, कृष्णप्रसाद धिताल, देशभक्त खनाल, रश्मी भट्ट, कमल बोहोरा, अस्मिता बस्नेत, खगेन्द्र न्यौपाने, विकास आनन्द, इन्द्र बिके र केशव अधिकारीले मुख्य भूमिका निभाएका छन् । निर्देशक सेञ्चुरीका अनुसार, फिल्मले ‘बाल विवाह सामाजिक अपराध हो’ भन्ने सन्देशसहित नेपाली समाजमा व्याप्त कुप्रथाको अन्त्य गर्न सबैलाई प्रेरित गर्नेछ ।
पर्वतको सालिजा ओख्रेनीमा छायांकन गरिएको फिल्ममा दीपकप्रसाद घिमिरेले लगानी गरेका छन् । कथा राजबहादुर सानेले लेखेका हुन् भने बीबी अनुरागी र रमेश सेञ्चुरीको संगीतले फिल्मलाई भावनात्मक बनाएको छ । अञ्जु पन्त, पूर्णकला बिसी र यदुराई लकान्द्रीको स्वरमा सजिएका गीतमा जीवन सेञ्चुरी र भीमबहादुर पौडेलको शब्द छ ।
‘जुना’लाई पूर्व राष्ट्रपति विद्यादेवी भण्डारीसहित राष्ट्रिय सभा र प्रतिनिधि सभाका सांसद, विज्ञ र समालोचकहरूले हेरेर सकारात्मक प्रतिक्रिया दिएका छन् । फिल्मलाई एप्पल इन्टरटेनमेन्ट, रिच इन्टरटेनमेन्ट र एफडी कम्पनीले वितरण गर्नेछन् । निर्देशकका अनुसार, यो फिल्मले नेपाल सरकारले सन् २०३० सम्म बाल विवाह अन्त्य गर्ने लक्ष्यलाई थप बल प्रदान गर्नेछ ।
Discussion about this post