इटहरी/ सान्भी इन्टरटेनमेन्ट प्रालिको व्यानरमा निर्माण भएको फिल्म ‘रंगी’ आगामी फागुन २ गते प्रदर्शन हुने भएको छ । बाबुछोरीको माया र सम्बन्धको कथालाई पर्दामा उतार्ने यो फिल्मले ग्रामीण परिवेशको भावनात्मक पाटोलाई उजागर गर्नेछ । फिल्मको रिलिज मिति सहितको पोस्टर र मोसन पोस्टर निर्माण टिमले बुधबार सार्वजनिक गरेको छ । पोस्टरमा सलोन बस्नेत र बाल कलाकार आयुषी ढकाललाई गम्भीर भावमा प्रस्तुत गरिएको छ, जसले कथा र पात्रहरूबारे कौतुहलता थपेको छ ।
सार्वजनिक मोसन पोस्टरमा सलोन र आयुषीसँगै ‘डेब्य’ नायिका नम्रता श्रेष्ठलाई देख्न सकिन्छ । मिस वर्ल्ड नेपाल २०२० की विजेता नम्रता यस फिल्मबाट अभिनयमा डेब्यू गर्दैछिन् । फिल्ममा दिलीप रायमाझी, उत्तम केसी, सुमिन गुरुङ, र विशाल पहारीको समेत अभिनय रहेको छ । फिल्म सलोन बस्नेतको डेब्यू निर्माण हो भने उनी नै यसको मुख्य अभिनेता हुन् । हेर्नुस् मोसन भिडियो ।
बाल कलाकारका रूपमा ‘नेपाली बाबु’बाट आफ्नो करियर सुरु गरेका सलोन ‘होस्टल’ र ‘हिरो’ जस्ता हिट फिल्मका मुख्य पात्र हुन् । सुरेश न्यौपानेको निर्देशन रहेको यो फिल्ममा सुमन गजमेरको लेखन, सौरभ लामाको छायांकन रहेको छ । यस्तै दुर्गेश थापा, आमेश भण्डारी र भीम बिसीको संगीत यो फिल्ममा समावेश गरिएको छ । फिल्मका निर्देशक सुरेश न्यौपानेले यसअघि ‘छक्का पन्जा’, ‘ए मेरो हजुर २’, ‘यात्रा’, ‘म यस्तो गीत गाउँछु २’, र ‘कृ’ जस्ता सफल फिल्ममा सहायक निर्देशनको अनुभव बटुलेका हुन् ।
Discussion about this post