इटहरी/ फिल्म ‘रङ्गेली’का निर्देशक अर्जुन सुवेदीले निर्देशन गर्ने आगामी फिल्म ‘सोल्टीनी’को लागी कलाकारहरूको लाईनअप बलियो बनेको छ । यतिबेला यो फिल्मको वर्कसप सुरु भैसकेको छ । फिल्ममा प्रकाश सपूत, परीक्षा लिम्बु, विल्सन विक्रम राईजस्ता चर्चित कलाकारहरूको साथै रवीन्द्र झा, प्रकाश घिमिरे, प्रेम सुब्बा, कविता आले, सुन्दर धिताल, सुजन खतिवडा जस्ता कलाकारहरू अनुबन्ध भएका छन् ।
साथै अडिसनमार्फत छनौट भएकी सब्बु गुरुङले पनि यस फिल्मबाट डेब्यु गर्ने भएकी छन् । यो फिल्मले समाजमा व्याप्त अमानवीयता र जातीय भेदभावका विरुद्ध आवाज उठाउने भएको छ । ‘सोल्टिनी’मा प्रकाश सपूतले ‘भीमसेन पोखरेल’ र परीक्षा लिम्बुले ‘दिलासा राई’को मुख्य भूमिका निभाउने छन् । फिल्ममा यी २ पात्रबीचको प्रेम कथा र समाजमा व्याप्त विभेदका विरुद्धको संघर्षलाई समेटेको छ ।
भोजपुरको रमणीय प्राकृतिक सौन्दर्यतामा छायाङ्कन हुने यस फिल्मले दर्शकलाई भावुक बनाउने कुरामा निर्माण पक्ष विश्वस्त छ । यो फिल्मको रेजिना बिस्ट र संसार चौलागाईँ निर्माता रहेका छन् भने प्रशान्त सिवाकोटी र हर्कुलस बस्नेतको संगीत र सुशन प्रजापतिको छायाङ्कन रहने छ । यहि पुस १५ गतेबाट छायाङ्कन सुरु हुने फिल्मलाई २०८२ सालको असोज ३ गते संविधान दिवसको दिन रिलिज गर्ने लक्ष्य राखिएको छ ।
Discussion about this post