धरानमा ‘युद्धको शहर’ इन्डक्ल्याप, फिल्मले कुलतमा फसेपछिको कथा प्रस्तुत गर्ने

इटहरी/ फिल्म युनिट फ्लोरमा निस्किएको ४ महिना बढीको अन्तरालमा फिल्म ‘युद्धको शहर’को छायांकन सम्पन्न भएको छ । कलाकार तथा प्राविधिक टिमको व्यस्तताका कारण केही विश्राम गर्दै छायांकन अगाडि बढाउदा ४ महिना बढी समय व्यतीत भएको यसका निर्देशक विजय सम्योक सुब्बाले जानकारी गराए । यो फिल्मको गएको श्रावण १४ गते शुभ मुहुर्त गर्दै छायांकन प्रारम्भ गरिएको थियो ।

निर्देशक सुब्बाका अनुसार मङ्सिर ३० गते धरानको ठिङाबारी स्थित टिकटक रिसोर्टमा फिल्मको अन्तिम दृश्य छायांकन गर्दै इन्डक्ल्याप गरिएको हो । फिल्मको कथा निर्देशक सुब्बाले नै तयार गरेका हुन् । पुर्वाञ्चल फिल्म एकेडेमी धरानको ब्यानरमा निर्माण भैरहेको फिल्म ‘युद्धको शहर’लाई याक्थुङ चलचित्रकर्मी संघ केन्द्रले संयोजकत्व गरिरहेको छ । यो फिल्मको मुख्य कलाकारको रुपमा जोसेफ लिम्बु र प्रशान्त राई रहेका छन् । निर्देशक राईका अनुसार यो फिल्म नितान्त धरानको परिवेशमा रहेर निर्माण गरिएको छ भने सम्पुर्ण कलाकारहरु समेत धरानकै रहेका छन् ।

यो फिल्मको कथामा बिशेषगरी किशोरकिशोरीहरु लागुुऔषध र कुलतमा फसेपछीको अवस्थालाई फिल्मले प्रस्तुत गर्ने निर्देशक सुब्बा बताउँछन् । कुनै बेला धरानमा धेरै मात्रमा लागुुऔषधको प्रयोग र कारोवारीहरुले अशान्त बनाएको बिषय यो फिल्ममा समाबेश छ । सहकारी मोडलमा यो फिल्म तयार गरिएको हुनाले कोहि पनि निर्माताको नाम सार्वजनिक गरिएको छैन् । यो फिल्ममा आवद्ध सबैको निर्माणमा महत्त्वपूर्ण भुमिका रहेको भनिएको छ । फिल्ममा तिरज लिम्बुको दुई वटा र बिजय वाम्बुले राईको एक वटा गरी जम्मा ३ वटा गीत समाबेश गरिने निर्माण युनिटले जनाएको छ ।

केही अघि धरानमा सम्पन्न याक्थुङ सिने अवार्डमा यो फिल्म ‘युद्धको सहर’को ‘ईन्जिन, ईन्जिन रेलैको ईन्जिन’ बोलको गीत सार्वजनिक गरिएको थियो । सो गीतमा गायक विजय वाम्बुले राई र गायिका सुरक्षा सेन्चुरीको स्वर, डिजे मेवाहाङ राईको शब्द संगीत र राजु कार्कीको संगीत संयोजन रहेको छ । यस्तै सार्वजनिक भिडियोमा टिकटक स्टार अनुप राउत र कलाकार मन्जु राईको नृत्य समावेश गरिएको छ । लोक डान्स शैलीमा तयार गरिएको उक्त भिडियोको नृत्य निर्देशन मणिकुमार लिम्बु र सानुराजा थेगिम रहेका छन् ।