इटहरी/ साहित्यकार तथा पत्रकार लोकमणि पौडेलको उपन्यासमा आधारित फिल्म ‘अग्नीदहन’ को ट्रेलर सार्वजनिक भएको छ । आउँदो मसिर ७ गते प्रर्दशनमा आउने तयारीमा रहेको फिल्ममा नेपाली समाजमा व्याप्त बोक्सीप्रथाका कारण महिलाहरूले भोग्नुपर्ने अन्यायपूर्ण अवस्थालाई उजागर गर्दै कथा बुनिएको छ । बिहीबार सार्वजनिक गरिएको दुई मिनेट ३६ सेकेण्डको ट्रेलरमा एक महिलालाई बोक्सीको आरोपमा यातना दिइएको हृदयविदारक दृश्यहरू समेटिएका छन् ।
फिल्ममा समाजसेवीको भूमिकामा रहेका प्रकाश घिमिरेले ‘बोक्सी अन्धविश्वास मात्र हो’ भन्ने सन्देश दिन खोजेका छन्, तर समाजले बोक्सीको नाममा निर्दोष महिलालाई हिंस्रक मानसिक यातना दिने अवस्थालाई ट्रेलरले स्पष्ट रूपमा देखाएको छ । प्रमिला तुलाचनले फिल्मकी पात्र अनुपमा भण्डारीलाई त्रसित बनाएको दृश्यले सशक्त भावनात्मक प्रभाव पारेको छ । हेर्नुस् ट्रेलर ।
निर्देशक घनश्याम लामिछानेले फिल्ममार्फत ‘मान्छे बोक्सी हुँदैन’ भन्ने विचारलाई अभियानकै रूपमा उठाएका छन् । फिल्ममा प्रकाश घिमिरे, माओत्से गुरुङ, अनुपमा भण्डारी, तुलसी क्षेत्री लगायतका कलाकारहरूले अभिनय गरेका छन् । राष्ट्रिय जागरण प्रतिष्ठानले निर्माण गरेको यो फिल्ममा लोकमणि पौडेलको कथा, कोविदशरण उपाध्यायको परिकल्पना रहेको छ ।
दीर्घ गुरुङको छायांकन तथा शंकर पाण्डेको प्रोडक्सन डिजाइन यो फिल्ममा रहेको छ । चलचित्र विकास बोर्डले यसलाई ‘विशेष चलचित्र अवार्ड’ पनि प्रदान गरिसकेको छ । नेपालका प्रमुख व्यक्तित्वहरूद्वारा प्रशंसित यो फिल्मले समाजमा चेतना फैलाउने उद्देश्यका साथ प्रचार अभियान पोखराबाट सुरु गरेको छ, जसले बोक्सीप्रथा जस्ता अन्धविश्वासविरुद्ध जनचेतना जगाउने अपेक्षा गरिएको छ ।
Discussion about this post