इटहरी/ हिमालय टेलिभिजन र ओएसआर रियालिटी मार्फत मङ्सिर महिनाको अन्त्यतिरबाट ‘कमेडी नाइट विथ च्याम्पियन’ प्रसारण हुने भएको छ । लोकप्रिय शो ‘कमेडी क्लब विथ च्याम्पियन’ को सफलतापछि अब सोही टिम नयाँ स्वरूपमा फर्कने भएको हो । निर्माण युनिटले शोको लोगो सार्वजनिक गर्दै कार्यक्रमको औपचारिक घोषणा गरेका छन् ।
यस पटक पनि निर्देशनको जिम्मा बिशाल भण्डारीले लिएका छन् । जसले कमेडी शोको क्षेत्रमा राम्रो छाप छोड्न सफल भएका छन् । भण्डारीको नेतृत्वमा सुमन कार्की, मेक्सम गौडेल, सजन श्रेष्ठ, कैलाश कार्की, पवन भट्टराई, भरतमणी पौडेल, सन्तोष थापा, सुमन कोइराला, र प्रभात लामा लगायतका प्रतिभाशाली कलाकारहरू जोडिएका छन् ।
कार्यक्रमलाई अझ भव्य बनाउन र दर्शकलाई उत्कृष्ट प्रस्तुति दिन निर्माण टिम पूर्ण रूपमा प्रतिबद्ध देखिन्छ । कलाकार तथा निर्देशक दिपा श्री निरौला यस सिजनमा पनि अध्यक्षको रूपमा कार्यक्रममा आबद्ध भएकी छन् । दर्शकहरूले पहिलो सिजनलाई अत्यधिक माया गरेकोले यसपटकको सिजन अझै उत्कृष्ट र भव्य सेटमा खिचिने तयारी भइरहेको निर्माण युनिटले जनाएको छ ।
Discussion about this post