‘डोरी’को निर्माण घोषणा, प्रमुख भुमिकामा अनुबन्ध भए यी ४ कलाकार

इटहरी/ नेपाली कथानक फिल्म ‘डोरी’को निर्माण घोषणा गरिएको छ । हरर, थ्रिलर, एक्सन र कमेडीको मिश्रणमा निर्माण हुन लागेको यस फिल्मलाई जि सेवेन प्रोडक्सनको ब्यानरमा निर्माण गरिने भएको हो । यो फिल्मलाई अरुण लामाले निर्देशन गर्नेछन् । लघु चलचित्र र वृत्तचित्र निर्देशनमा अनुभवी लामाका लागि यो पहिलो फिचर फिल्म हो, जसले नेपाली सिनेमा क्षेत्रमा फरक शैलीको कथा प्रस्तुत गर्ने लक्ष्य लिएको छ ।

निर्देशक लामाका अनुसार, ‘डोरी’को कथा आर्थिक कठिनाइका बीच साहसी निर्णय लिने एक युवाको जीवनमा आधारित छ । फिल्ममा हाँसो, त्रास, संघर्ष र असफलताको मार्मिक दृश्यलाई रोचक तरिकाले प्रस्तुत गर्दै जीवनको कठिन यात्रा दर्शकसामु पस्किने प्रयास गरिएको छ । फिल्ममा प्रवीण खतिवडा, शिशिर बाङ्गदेल, कविता आले, राज पौडेल, विशाल राई, मिलन राई, नूतन र वीरेन्द्र सिंह कुशवाहा मुख्य भूमिकामा देखिनेछन् ।

यस फिल्ममार्फत राज पौडेलले अभिनयमा डेब्यू गर्दैछन् भने मुख्य नायिकाको छनोट अन्तिम चरणमा पुगेको छ । ‘डोरि’को सौरभ लामाले सिनेमाटोग्राफी र राजु तामाङले एक्सन निर्देशन गर्नेछन् । यो फिल्मको निर्मातामा ‘मिस्टर एक्स’ निर्माता र राज थापा कार्यकारी निर्माता रहेका छन् । सन् २०२५ मा प्रदर्शनको तयारीमा रहेको ‘डोरी’ले नेपाली दर्शकलाई फरक शैलीको हरर, थ्रिलर र कमेडीको संयोजनमार्फत नयाँ अनुभव प्रदान गर्ने अपेक्षा गरिएको छ ।