इटहरी/ यहि कार्तिक २२ गते छठको अवसर पारेर सार्वजनिक प्रदर्शनमा आउने फिल्म ‘फिरफिरे फिरिरी’को आइटम गीत ‘टिमिक्कै चोली’ सार्वजनिक गरिएको छ । हरर कमेडी जनरामा बनेको यस फिल्मको सार्वजनिक गीतमा चर्चित गायिका अनु चौधरीले स्वर दिएकी छिन् । गीतमा प्रशान्त सिवाकोटीको शब्द र संगीत रहेको छ भने मोडल अलिशा शर्माको नृत्य देख्न सकिन्छ । यो फिल्म ‘फिरफिरे फिरिरी’ नबिन भट्टको डेब्यु निर्देशनमा तयार भएको हो । यसअघि फिल्मको शिर्ष गीत सार्वजनिक भएको थियो ।
फिरफिरे फिरिरी बिन्दबासिनी क्रियसनको ब्यानरमा निर्माण भएको हो । यसका निर्माता मनोज कुमार अधिकारीले यसअघि ‘नौ डाँडा पारी’ र ‘मंगलसुत्र’ जस्ता फिल्म निर्माण गर्दै अभिनय समेत गरेका थिए भने यसको सह निर्माता नितिश पुन रहेका छन् । निर्माता अधिकारीले विश्वभर हरर कमेडी फिल्मको लोकप्रियतालाई ध्यानमा राख्दै यो फिल्मले नेपाली दर्शकलाई भरपुर मनोरञ्जन दिने विश्वास व्यक्त गरेका छन् । सन्दीप श्रेष्ठ र नबिन भट्टको लेखनमा बनेको ‘फिरफिरे फिरिरी’ मा सन्दीप श्रेष्ठ र भावना उप्रेतीले डेब्यु गर्दैछन् । हेर्नुस् गीत ।
यो फिल्मको प्रमुख कलाकारमा मनोज कुमार अधिकारी, सन्दिप श्रेष्ठ, भावना उप्रेती, रबिना केसी, पुष्प अवस्थी, र सुर्यमान लिम्बु लगायतका कलाकारहरूको अभिनय रहेको छ । फिल्ममा जितु तामाङको छायांकन, रोशन दास, प्रकाश दाहाल र अग्नि सुबेदीको सहायक निर्देशन, केशव राज भट्टको कोरियोग्राफी, एलिस कार्कीको ब्याकराउण्ड म्युजिक, अमित श्रेष्ठको साउण्ड डिजाइन र अनन्त घिमिरेको सम्पादन रहेको छ । चलचित्रलाई आर.आर फिल्म्सले देशभर वितरण गर्नेछ भने डिजिटल अधिकार म्युजिक नेपालले लिएको छ ।
Discussion about this post