कार्तिक १५ लाई प्रदर्शन मिति तय गर्दै फिल्म ‘पूर्ण बहादुरको सारङ्गी’को पोस्टर सार्वजनिक

इटहरी/ आउँदो कार्तिक अर्थात तिहारको लक्ष्मीपुजाको दिनलाई आफ्नो प्रदर्शन मिति तय गर्दै फिल्म ‘पूर्ण बहादुरको सारङ्गी’ को फर्स्ट लुक पोस्टर सार्वजनिक गरिएको छ । जसले फिल्मको प्रमुख पात्रहरूलाई पहिलो पटक दर्शकसमक्ष प्रस्तुत गरेको छ । पोस्टरमा विजय बराललाई झुस्स दारी र हँसिलो अनुहारमा देखाइएको छ । जसले उनको चरित्रको रहस्य र गम्भीरतालाई संकेत गर्छ ।

अर्कोतर्फ प्रकाश सपूतलाई सरकारी स्कुलको पोशाकमा देखाइएको छ । जहाँ उनी हातमा मार्कसिट बोकेर दौडिरहेका छन् । यो दृश्यले स्कुलमा उत्कृष्ट प्रदर्शनको संकेत गर्दछ र पोस्टरले विजय र प्रकाशबीचको गहिरो सम्बन्धको संकेत गरेको जस्तो देखिन्छ । फिल्मको निर्देशन सरोज पौडेलले गरेका छन् । जसले नेमा गन्धर्व परिवारको जीवनलाई सोसल-ड्रामा शैलीमा प्रस्तुत गर्ने प्रयास गरेका छन् ।

फिल्ममा विजय र प्रकाशसँगै मुकुन भुसाल, बुद्धि तामाङ, माओत्से गुरुङ, अञ्जना बराइली र अन्य कलाकारहरूको पनि महत्वपूर्ण भूमिका छ । फिल्मका निर्माणकर्ताहरू विनोद पौडेल र प्रतीक सुवेदी हुन् । यो फिल्म पुर्ण बहादुरको सारङ्गीलाई सेभेन सिज इन्टरटेनमेन्टले विश्वभर वितरण गर्दैछ । फिल्मको पटकथा तथा संवाद महेश दवाडीले लेखेका हुन् । विनोद पौडेल र प्याट्रिक सुवेदीको लगानी रहेको फिल्मका कार्यकारी निर्माता रमेश चौलागाईं, हरि श्रेष्ठ र रमेश ढकाल हुन् ।