इटहरी/ अभिनेता अनमोल केसी अभिनीत फिल्म ‘जेरी अन टप’ मा लोकप्रिय कथा वाचक साइग्रेस पोखरेलको विशेष भूमिका रहने भएको छ । पोखरेलले यस फिल्ममा ‘क्रिएटिभ राइटर’का रूपमा काम गर्नेछन् । जसले फिल्मको पटकथा र संवादमा गहिराइ थप्नेछ । उनले अनमोलसँगको तस्बिर सामाजिक सञ्जालमा सेयर गर्दै आफू यस फिल्ममा संलग्न भएको जानकारी गराएका छन् ।
पोर्चुगलमा बस्दै आएका पोखरेल यसअघि ‘अधुरो प्रेम’ नामक आफ्नो कथा आधारित फिल्म बनाउने घोषणा गरेर चर्चामा आएका थिए । तर, सो फिल्मको रिलिज मिति भने अझै अज्ञात छ । ‘जेरी अन टप’ फिल्मको निर्देशन सुयोग गुरुङले गर्दैछन् भने केही दिनभित्रै यसको छायाङ्कन काठमाडौं, लुक्ला र भारतको लद्दाखमा सुरु हुने तयारी गरिएको छ ।
अनमोल केसीसँगै फिल्ममा आँचल शर्मा र जसिता गुरुङको पनि मुख्य भूमिका रहनेछ । भ्यालेन्टाइन्स डेको अवसर पारेर आउँदै गरेको फागुन २ गते रिलिज हुने तय गरिएको यो फिल्ममा अनमोल केसीले नयाँ र रोमाञ्चक भूमिका निभाउने अपेक्षा गरिएको छ । साइग्रेस पोखरेलको संलग्नताले फिल्मलाई थप आकर्षक बनाउने विश्वास गरिएको छ ।
Discussion about this post