इटहरी/ संबिधान दिवसको अवसर पारेर असोज ३ गते प्रदर्शनको तयारीमा रहेको फिल्म ‘खुस्मा’को पहिलो गीत ‘रुकुम मैकोट’ सार्वजनिकसंगै यसको चर्चा चुलिएको छ । धिरज मगर र उपासना सिंह ठकुरीको प्रमुख भूमिकामा रहेको यस फिल्मले प्रेमकथालाई मगर समुदायको परिवेशमा प्रस्तुत गरेको छ । सार्वजनिक गीतको चर्चासंगै यतिबेला यो गीत युट्युब नेपालको म्युजिक ट्रेन्डिङको ८ औं स्थानमा पुग्न सफल भएको छ, साथै दर्शकहरूले यसलाई निकै मन पराइरहेका छन् ।
हामिले यो समाचार तयार गर्दैगर्दा यस गीतले ४ लाख ५ हजार बढी भ्युज र २१ हजार बढी लाइकसंगै १३ हजारबढी सकारात्मक प्रतिक्रिया पाएको छ । धेरैले गीतलाई ‘मनमोहक’ र ‘सांस्कृतिक पहिचानको सुन्दर प्रतिबिम्ब’ भन्दै प्रशंसा गरेका छन् । विशेषगरी गीतमा धिरज र उपासनाको केमेस्ट्रीले दर्शकहरूको मन जितेको छ । हेर्नुस् भिडियो ।
एक दर्शकले लेखेका छन्, ‘धिरज र उपासना तारा झैं चम्किला छन।’ यस्तै अर्को दर्शकले भने, ‘जति हेरेपनी हेरिरहुँ जस्तो लाग्ने गीत, अर्गानिक आफ्नै मौलिक भेषभुषा, आफ्नै संस्कृतिको धनी देश नेपाल।’ फिल्मका निर्देशक अशोक थापा मगर हुन् । जसले यसअघि विभिन्न डकुमेन्ट्री सिनेमाहरू लेखन तथा निर्देशन गरेर नौ वटा अन्तर्राष्ट्रिय फिल्म महोत्सवबाट अवार्ड प्राप्त गरेका छन् । ‘खुस्मा’ फिल्मले जनयुद्धको पृष्ठभूमिमा रहेको प्रेमकथालाई पर्दामा उतार्ने प्रयास गरेको छ ।
फिल्ममा धिरज र उपासनाका अलवा माओत्से गुरुङ, खड्क बहादुर पुन (खबपु), सुजाता राई, विजय सुब्बा, राज थापा काउचा, अस्तित्व भट्टचन, संगीता थापा मगर, अरुन मगर, सारा राई, श्वेता मिश्र, विवेश मगर लगायतका कलाकारको अभिनय रहेको छ । एम मिडिया प्रालिको ब्यानरमा निर्माण भएको फिल्मको निर्मातामा विर बहादुर लामा, चन्द्र बहादुर भट्टचन, मान बहादुर धनाह मगर र बेतान मगर छन् भने सह-निर्माता सुस्मिता बुढाथोकी हुन् ।
Discussion about this post