इटहरी/ कोशी प्रदेशको मुख्य मुटु मानिने इटहरीमा स्थापित पूर्वाञ्चल इन्स्टिच्युट अफ फिल्म एण्ड टेलिभिजन (PIFT) ले आफ्नो सेवा स्थायी रूपमा बन्द गर्ने निर्णय गरेको छ । यस कदमले कोशी प्रदेशमा नै रहेर चलचित्र क्षेत्रमा सिक्दै अघि बढ्नेहरुका लागी निराशा छाएको छ । पिफ्ट स्थापना भएको ५ वर्षपछी बन्द भएको हो । यो अवधीमा यस संस्थाले कोशी प्रदेशका विद्यार्थीहरूलाई फिल्म तथा टेलिभिजनको क्षेत्रमा आवश्यक सीप प्रदान गर्दै आएको थियो ।
तर, हाल देशमा जारी आर्थिक समस्या र कला क्षेत्रप्रति पर्याप्त समर्थनको अभावका कारण देखाउदै संस्थाले अबका दिनमा निरन्तरता दिन नसक्ने अवस्था सिर्जना भएको हो । पिफ्टका प्रमुख कार्यकारी अधिकृत तथा संस्थापक रोनिश राउतले भने ‘हामीले आफ्नो स्तरबाट सक्दो प्रयास गरेका थियौं तर, कला क्षेत्रमा आवश्यक सहयोग र जिम्मेवारीमा रहेका व्यक्तिहरूको दृष्टिकोणको कमीले गर्दा हाम्रो संस्था सञ्चालन गर्न असम्भव भयौं । यो निर्णय लिनुपर्दा हामीलाई अत्यन्तै दुःख लागेको छ ।’
उनले थपे ‘हाम्रो संस्थाबाट अध्ययन गरेका विद्यार्थीहरूलाई हामीले प्रदान गरेको शिक्षा र प्रशिक्षणले उनीहरूलाई भविष्यमा सहि दिशा दिने विश्वास लिएका छौं ।’ पिफ्टबाट छोटो तथा लामो अवधिका विभिन्न कोर्सहरूमा २ सय भन्दाबढी विद्यार्थीहरू स्नातक भइसकेका छन् । ती विद्यार्थीहरू अहिले विभिन्न फिल्म, टेलिभिजन र मिडिया उद्योगमा कार्यरत रहेका छन् । संस्थाले यी सबै विद्यार्थीहरूलाई भविष्यमा अझै ठूलो सफलता प्राप्त होस् भन्ने कामना समेत गरेको छ ।
पिफ्ट बन्दको निर्णयले नेपाली कला, चलचित्र र टेलिभिजन क्षेत्रमा थोरै भएपनी धक्का पुगेको छ । यद्यपि, संस्थाका संस्थापक रोनिश राउतले आफू र आफ्नो टिमले आगामी दिनमा नेपाली फिल्म तथा टेलिभिजन क्षेत्रको विकासका लागि कुनै न कुनै रूपमा योगदान गरिरहने आश्वासन दिएका छन् । उनले ‘हामीलाई साथ र समर्थन गर्ने हरेक व्यक्तिप्रति हामी अत्यन्तै आभारी छौं’ भन्दै ‘यो यात्रा सम्भव बनाउन सहयोग पुर्याउने सबैलाई हामीले हृदयदेखि धन्यवाद दिन चाहन्छौं।’ भनेका छन् ।
Discussion about this post