इटहरी/ फिल्म ‘एक्लो–१’ निर्माणको तयारी पूरा गर्दै भोलि शुक्रवारदेखि छायांकनमा निस्कने भएको छ । यसै क्रममा, निर्माण टिमले नायक प्रदीप खड्काको चरित्र पोस्टर सार्वजनिक गरेको छ, जसमा उनी ‘कल्की’को रूपमा प्रस्तुत छन् । यो नामले बलिउडमा चर्चित प्रभाष अभिनित ब्लकबस्टर फिल्मलाई स्मरण गराउँछ । फिल्ममा प्रदीपको यो पात्र विशेष रुपमा चयन गरिएको बताईएको छ ।
निर्देशक प्रदीप शाहीको निर्देशनमा निर्माण हुने यो फिल्ममा बेनिशा हमाल, विजय लामा, कविता नेपाली, सुनिल थापा, सुरज सिंह ठकुरी र दिया पुनजस्ता चर्चित कलाकारहरूको पनि अभिनय रहनेछ । फिल्मका कार्यकारी निर्माता क्षितिज सुवेदीका अनुसार ‘एक्लो’को कथा अन्तरिक्षमा आधारित हुनेछ, जसले यसलाई अन्य फिल्महरूभन्दा फरक र विशेष बनाउँछ।
फिल्मको प्रि-प्रोडक्सन तयारी भव्य रुपमा सम्पन्न भइसकेको छ । साई प्रोडक्सनको ब्यानरमा निर्माण हुने यो फिल्म सन् २०२५ मा रिलिज गरिने योजना निर्माण युनिटको रहेको छ । फिल्मको छायांकनका लागि बेलायती अभिनेता जेमी बेकन नेपाल आइपुगेका छन्, जसले यो फिल्ममा मुख्य भूमिकामा अभिनय गर्नेछन् ।
Discussion about this post