इटहरी/ यहि भदौ २१ गते तीजको अवसर पारेर सार्वजनिक प्रदर्शनमा आउने फिल्म ‘रावायण’को विशेष रोमान्टिक गीत ‘तिम्रै लागि’ सार्वजनिक गरिएको छ । बुधबार ओएसआर डिजिटलको युट्युब च्यानल मार्फत रिलिज भएको यो गीतमा पूजा शर्मा र पल शाहको जोडीलाई प्रस्तुत गरिएको छ । यस गीतको कोरियोग्राफी रामजी लामिछानेले गरेका छन् भने गीतमा बलिउडका चर्चित गायक कुणाल गाञ्जावाला र सोनु कक्करले स्वर दिएका छन् ।
भारतीय संगीतकार नीरज सिंहले संगीत संयोजन गरेको यस गीतको शब्द कृष्णहरि बरालले लेखेका हुन् । यो गीतलाई मुम्बईमा रेकर्ड गरिएको हो । फिल्म ‘रावायण’का अन्य गीतहरूमा पनि भारतीय गायकहरूको आवाज सुन्न पाइन्छ । एक्सनप्रधान यो फिल्मको निर्देशन सुदर्शन थापाले गरेका छन् । जहाँ पल शाहले दोहोरो भूमिका निर्वाह गरेका छन् । शाहको यो पहिलो एक्सन प्रधान फिल्म हो । यस्तै ‘रावायण’मा पूजा शर्मा टेलिभिजन सञ्चारकर्मीको भूमिकामा देखिनेछिन् । हेर्नुस् गीत
यस फिल्ममा प्रियंका कार्की, प्रमोद अग्रहरी, प्रकाश शाह, अर्जुनजंग शाही, शर्मीला मल्ल र निकिता चण्डकले पनि अभिनय गरेका छन् । सुदर्शन थापा प्रोडक्सन र पूजा शर्मा प्रोडक्सनको सहकार्यमा निर्माण भएको यो फिल्मकी निर्माता पूजा शर्मा हुन् । सुशन पाठक कार्यकारी निर्माताका रूपमा रहेका छन् । फिल्मको कथा सुदर्शन थापाले लेखेका हुन् भने पटकथा शिवम अधिकारीले लेखेका छन् । सौरभ लामाको छायांकन, श्री श्रेष्ठको एक्सन निर्देशन र मिलन श्रेष्ठको सम्पादन यो फिल्म ‘रावायण’मा रहेको छ ।
Discussion about this post