‘पिताम्बर’मा भित्रिए दयाहाङ राई, कलाकारहरूको मजबुत लाईनअप

इटहरी/ नेपाली फिल्म ‘पिताम्बर’ मा चर्चित अभिनेता दयाहाङ राईको आगमनले नयाँ उत्साह थपिएको छ । यो फिल्मले अभिनेता आर्यन सिग्देलको प्रवेशपछि नै धेरैको ध्यान केन्द्रित गरेको थियो, तर अब दयाहाङको सामेलले यसलाई झन् विशेष बनाएको छ। फिल्मका वितरक रोहित कट्टेलले हालै दयाहाङ र निर्देशक कृषा चौलागाईंले स्क्रिप्टमा छलफल गरिरहेको तस्बिर सार्वजनिक गरे, जसले फिल्मप्रतिको उत्सुकता बढाएको छ।

यहि फिल्म मार्फत दयाहाङ र प्रदीप खड्का पहिलो पटक एकसाथ पर्दामा देखिनु सिनेप्रेमी दर्शकका लागि निकै रोचक रहनेछ। यता, आर्यन सिग्देल र दयाहाङले यसअघि दुई फिल्महरूमा सहकार्य गरिसकेका छन्, र तेस्रो पटकको यो सहकार्यले पुराना फ्यानहरूलाई पुनः उत्साहित गर्नेछ।

फिल्ममा दयाहाङ, आर्यन, प्रदीप, सौगात मल्ल लगायतका चर्चित कलाकारहरूको इन्ट्रीले ‘पिताम्बर’लाई नेपाली फिल्म उद्योगको एक महत्वपूर्ण हिस्सा बनाएको छ। भदौको पहिलो सातादेखि सुरु हुने दोस्रो चरणको छायाङ्कनमा यी सबै कलाकारहरूको भूमिका निकै महत्त्वपूर्ण रहने अपेक्षा गरिएको छ। यसअघि नवलपरासीको त्रिवेणी धाममा पहिलो चरणको छायाङ्कन सम्पन्न भएको थियो। ‘पिताम्बर’ ले दर्शकहरूलाई एक अविस्मरणीय अनुभव दिने लक्ष्य राखेको छ।