२२ दिनमा सकियो दया र सिर्जना अभिनित फिल्म ‘कर्साङ’को छायांकन

इटहरी/ फिल्म ‘कार्साङ’ले आफ्नो छायांकन सफलतापूर्वक सम्पन्न गरेको छ। यम शेर्पाको निर्देशनमा बनेको यो फिल्मले २२ दिनमा इन्डक्ल्याप गरेको हो । सिन्धुपाल्चोक जिल्लाको बाह्रबिसे नगरपालिका र भोटेकोसी गाउँपालिकामा मुख्य दृश्यहरू खिचिएपछि छायांकन समाप्त गरिएको हो। निर्देशक शेर्पाले फिल्मको छायांकन योजनाबद्ध तरिकाले समयमै सम्पन्न भएकोमा खुसी व्यक्त गरेका छन् भने अब पोस्ट-प्रोडक्शनमा ध्यान केन्द्रित गरिने बताएका छन्।

यो फिल्म सामाजिक कथावस्तुमा आधारित छ, जसको कथा, पटकथा, तथा संवाद यम शेर्पाले नै लेखेका छन्। सर्ट फिल्महरू निर्देशन गरिसकेका शेर्पाका लागि ‘कार्साङ’ पहिलो फिचर फिल्म हो। यार्सा फिल्मस् र पुरुषोत्तम प्रधान फिल्मसको संयुक्त प्रस्तुतिमा बनेको यस फिल्ममा दयाहाङ राई र नव-अभिनेत्री सिर्जना निङ्लेखुले प्रमुख भूमिकामा अभिनय गरेका छन् । सिर्जनाको लागि यो डेब्यु फिल्म हो भने उनले दयाहाङसँग जोडीको रुपमा भूमिका निभाएकी छिन्। हालै सार्वजनिक गरिएका तस्बिरहरूमा उनीहरूलाई रैथाने भेषभूषामा देख्न सकिन्छ।

दयाहाङ र सिर्जनासँगै फिल्ममा जितु नेपाल, दिया मास्के, बुद्धि तामाङ, प्रेम लोप्चन, डोमा ह्योल्मो, सृष्टि गौतम, छोकी शेर्पा, सुरवीर पण्डित, र कर्मा शेर्पाले अभिनय गरेका छन्। बाल कलाकारका रूपमा राशी लिम्बु र सोहन थापा पनि समावेश छन्। फिल्मको निर्माण तथा सिनेमाटोग्राफीको जिम्मा पुरुषोत्तम प्रधानले लिएका छन् भने प्रोडक्सन म्यानेजरको भूमिकामा दिलीप पन्त छन्। फिल्मको प्रदर्शन मिति हालसम्म तय भएको छैन तर देशभरि वितरणको जिम्मेवारी भने आरआर फिल्म्स्ले लिएको छ।