दिपक-दिपा र जितुको टकराब ? ‘छक्का पन्जा-५’ संग भिड्दै ‘ज्वाईं साब’

इटहरी/ दिपक-दिपाको क्याम्पबाट बाहिरिएपछी जितु नेपाल फिल्मको हिरो बने । तर, उनको हिरोपना दर्शकले रुचाएनन् । अभिनेत्री साम्राज्ञि राज्यलक्ष्मी शाहसंग जोडि बाधेर सिनेमाको पर्दामा ‘ह्यारी कि प्यारी’ बाट प्रमुख अभिनेता अर्थात हिरोको रुपमा डेब्यु मारे । उ बेला फिल्मले सन्तोषजनक व्यापार नगरेपनी आफ्नो यात्रालाई जितुले रोकेनन् । र अभिनय गरे ‘ज्वाईं साब’मा ।

अहिले यो फिल्म दिपक-दिपाकै फिल्म ‘छक्का पन्जा-५’ संग जुध्न आईपुगेको छ । आगामी असोज २४ गते अर्थात दशैँको फुलपातीलाई प्रदर्शन मिति तय गरेको ‘छक्का पन्जा ५’ संग जितु नेपाल अभिनित ‘ज्वाईं साब’ पनि प्रदर्शनमा आउने भएपछि फिल्मले प्रदर्शन मिति नपाएर हैन दिपक-दिपासंगको दुष्मनी साध्ने हेतुले जुध्न आएको सिने नगरीमा अड्कल बाजि सुरु भएको छ ।

एकअर्का बिच मनमुटाव नरहेको भनेर मिडियामा भनिरहेका हुन्छन् । तर, यस्तै कुराहरुले रिसिबी सेलाएको छैन भन्ने ठाउँ प्रसस्तै मिल्ने गर्छ । फिल्ममा वसन्त निरौलाको निर्देशन रहेको छ । निर्माण टिमले हालै फस्टलुक पोस्टर सार्वजनिक गर्दै रिलिज मिति तय गरेको हो । सार्वजनिक पोस्टरमा नीति र जितुलाई बेहुलाबेहुलीको भेषमा प्रस्तुत गरिएको छ । ‘ज्वाईं साब’मा जितुको अलावा नीति शाह, हिमेश पन्त, बुद्धि तामाङ लगायतको कलाकारको मुख्य भूमिकामा अभिनय रहेको छ । यसको पोस्ट प्रोडक्शनको काम अन्तिम चरणमा छ भने एक गीतको मात्र छायाङ्कन गर्न बाँकी रहेको छ ।