इटहरी/ आगामी भदौ २१ गतेबाट रिलिज हुने चलचित्र ‘रावायण’को टिजर सार्वजनिक भएको छ । काठमाडौंमा शुक्रवार एक कार्यक्रम गर्दै टिजर सार्वजनिक गरिएको हो ।
टिजरमा चलचित्रका नायक पल शाहको एक्सनलाई प्राथमिकता दिइएको छ । अधिकांश दृश्यमा द्वन्द्वलाई स्थान दिइएको टिजरमा दाह्री र जुँगाको गेटअपमा देखिएका पलले खल पात्रसँग गरेको द्वन्द्वलाई प्राथमिकतामा राखिएको छ । चलचित्रमा भिलेन चरित्रमा देखिएका प्रमोद अग्रहरी, प्रकाश शाह, प्रदीप ढकाललाई निकै सशक्त रूपमा प्रस्तुत गरिएको छ ।
टिजरमा नायिका पूजा शर्मा, प्रियङ्का कार्की, निकिता चण्डक पनि फिचर्ड छन् । प्रेमकथाका चलचित्र निर्माणमा अब्बल मानिएका निर्देशक सुदर्शन थापा चलचित्र ‘रावायण’का निर्देशक हुन् । नायक पल शाहले आफ्नो रोमान्टिक छविलाई पर्दामा देखाईरहेकोमा ‘रावायण’ बाट नयाँ स्वाद दिँदैछन् । यो फिल्ममा अभिनेता शाहको ‘कान्छा’ र ‘रागव’ गरि दोहोरो भूमिका रहेको छ । हेर्नुस् टिजर ।
ट्रेलर सार्वजनिक कार्यक्रममा फिल्मकी निर्मात्री तथा अभिनेत्री पुजा शर्माले अब पल आफुसंगै रहेकाले रोएर फिल्म चलाउन नपर्ने बताईन् । सुदर्शन थापा प्रोडक्शन र पूजा शर्मा प्रोडक्शनको संयुक्त ब्यानरमा बनेको चलचित्रकी निर्माता पूजा शर्मा हुन् । चलचित्रमा सुशन पाठक कार्यकारी निर्माता छन् भने पल शाह, पूजा शर्मा, प्रियङ्का कार्की, प्रमोद अग्रहरी, निकिता चण्डक, प्रकाश शाह, कैलाश रावल, अर्जुनजंग शाही, शर्मिला मल्ल, प्रदीप ढकाल, रजिता पराजुली लगायतको अभिनय छ ।
चलचित्रमा शिवम अधिकारीको लेखन, प्रदीप श्रीवास्तवको पटकथा, सौरभ लामाको छायाङ्कन, मिलन श्रेष्ठको सम्पादन, नीरज सिंह, रेवन आरती सिंहको सङ्गीत, नकासा अजिज, कुनाल गुञ्जवाला, सोनु कक्करको स्वर, डा. कृष्णहरि बराल र प्रदीप श्रीवास्तवको शब्द, विक्रम स्वार र रामजी लामिछानेको कोरियोग्राफी, श्री श्रेष्ठको एक्सन, समीर मियाँको भीएफएक्स, राजेन्द्र मोक्तानको कलर र विजय बस्यालको पोस्टर डिजाइन छ । चलचित्रको वितरण आरआर फिल्मसले गर्नेछ भने डिजिटल पार्टनरको रूपमा ओएसआर डिजिटल रहेको छ ।
Discussion about this post