इटहरी/ निर्देशक मिलन चाम्स निर्देशित फिल्म ‘वर एण्ड वधु’ को रोमाण्टिक गीतको भिडियो सार्वजनिक गरिएको छ । आइतबार काठमाडौमा एक कार्यक्रमको आयोजना गरि ‘तिमी संग’ बोलको गीत ओएसआर डिजिटल मार्फत युट्युबमा सार्वजनिक गरिएको हो । आउँदो भदौको १४ गतेबाट सार्वजनिक प्रदर्शनमा आउने फिल्मको सार्वजनिक गीतलाई लेखु सहयात्रीले लेखेका हुन् ।
गीतमा अर्जुन पोख्रेलले संगीत भरेका छन् भने अन्जु पन्त र प्रताप दासको सुमधुर स्वर सुन्न सकिन्छ । सार्वजनिक गीतको भिडियोमा फिल्म ‘वर एण्ड वधु’का प्रमुख कलाकार आँचल शर्मा र नवअभिनेता विवेक कर्माचार्य फिचर्ड छन् । मनमोहक दृष्यमा कैद गरिएको भिडियोमा आँचल र विवेकको क्यामेस्ट्री जेमेको देखिन्छ । दुबै एकअर्कामा समर्पित भएर प्रस्तुत भएका छन् । हेर्नुस् भिडियो ।
एलआरके इन्टरटेन्मेन्टको प्रस्तुतिमा निर्माण भएको फिल्म ‘वर एण्ड वधु’ का लेखक प्रदीप भारद्वज हुन् । फिल्मका निर्माताको रुपमा जानुका थापा रहेकी छन् भने कार्यकारी निर्माता रोमानियाका अमित रिजाल रहेका छन् । फिल्ममा मुख्य सहायक निर्देशकको कार्य गिरिराज घिमिरेले सम्हालेका छन् ।हिमाल केसीको द्वन्द ‘वर एण्ड वधु’मा रहेको छ ।
यो फिल्मको गीतहरुमा कविराज गहतराज र सुस्मिता वाईवाको कोरियोग्राफी रहेको छ । फिल्ममा आँचल र विवेकको अलावा बिजय लामा, गरिमा शर्मा, भिजु पार्की, किरण केसी, सरिता लामिछाने, कुसुम शर्मा, सृष्टि खड्का, हिमेश पन्त, दिनेश काफ्ले, यमन श्रेष्ठ, रविन्द्र खड्का, अन्शु महर्जन, सीता न्यौपाने लगायत कलाकारहरूको समेत अभिनय रहेको छ । फिल्मलाई रविन्द्र न्यौपाने र अनिश श्याङ्देनले छायांकन गरेका हुन् भने मिलन श्रेष्ठले सम्पादन गरेका छन् ।
Discussion about this post