इटहरी/ अभिनेत्री जसिता गुरुङले आफ्नो व्यक्तिगत कुरालाई राष्ट्रिय टेलिभिजनमा उठाईएको भन्दै आपत्ति जनाएकी छन् । अभिनेता तथा टेलिभिजन कार्यक्रम प्रस्तोता सुरज सिंह ठकुरीको लोकप्रिय कार्यक्रम ‘इट्स माई शो’ अहिले उनले छोडेपछि ओसिन सिटौला सो कार्यक्रमको प्रस्तोताको रुपमा आएकी छन् । उनले संचालन गरेको पहिलो एपिसोड नै विवादमा परेको हो । उनको पहिलो गेस्टको रुपमा अभिनेत्री द्वय साम्राज्ञी राज्यलक्ष्मी शाह र स्वस्तिमा खड्कालाई निम्त्याएकी थिइन् ।
उक्त कार्यक्रमको एक सेग्मेन्टमा प्रश्न सोध्ने क्रममा अभिनेत्री जसिता गुरुङको प्रेमीहरुको बारेमा ओसिनले प्रश्न गर्छिन् । जहाँ अनमोल केसीको प्रेमिकाको रुपमा अतिथी बनेर कार्यक्रममा पुगेकी स्वस्तिमा र साम्राज्ञीले जसिताको नाम लिन्छन् । उक्त कुराले गर्दा जसिताले आपत्ति जनाएकी हुन् । आफुले यो बारेमा बोल्नै पर्ने भयो भन्दै अभिनेत्री जसिताले इन्स्टाग्राममा ओसिन, स्वस्तिमा र साम्राज्ञीसंगै कान्तिपुर टेलिभिजनलाई समेत मेन्सन गर्दै स्ट्याटस पोस्ट गरेकी छन् । सो स्ट्याटसमा उनले यो अन्तर्वार्ता हेरेपछी आफुलाई गहिरो दु:ख लागेको लेखेकी छन् । उनले ‘के हामी साच्चै एक महिलाले अर्को महिलालाई होच्याउने प्रवृत्तिविरुद्ध छौँ ?’ भन्दै उनिहरुसंग आफ्नो व्यक्तिगत समस्या नरहेको बताएकी छन् ।
आफुले उक्त अभिनेत्रीहरु तथा होस्टलाई सुरुदेखी नै उच्च सम्मान गर्दै आएको लेख्दै जसिताले ‘तपाईहरुको यो कार्यले कतिको जीवन प्रभावित हुनेछ भन्ने सोच्नुभएको थिएन ?’ भनेर प्रश्न गरेकी छन् । जसिताले प्रश्नमाथी प्रश्न गर्दै ‘महिला भएर महिलाकै विरुद्ध यस्तो कार्य गरेर कस्तो उदाहरण बन्नुभएको ?, मेरो परिवारले तपाईको अन्तर्वार्ता र समाचार हेरिरहेका छन भन्ने लाग्दैन ?, कसैको व्यक्तिगत जीवनलाई सार्वजनिक रुपमा बदनाम गर्न र चर्चा गर्ने कारण के हो ?’ जस्ता प्रश्नहरु तेर्स्याएकी छन् ।
स्ट्याटसको अन्त्यमा आफुलाई साम्राज्ञीले ब्लक गरेको समेत लेखेकी छन् । जसको कमेन्टमा अभिनेत्री स्वस्तिमाले माफी माग्दै आवेगपुर्ण सो कुरा बाहिरिएको लेखेकी छन् । यस्तै उक्त पोस्टको कमेन्टमा अनमोल केसीले पनि ‘कृपया वास्तविक चरित्रमा ध्यान केन्द्रित गर्नुहोस्, मात्रै रिल क्यारेक्टरमा केन्द्रिय नहुनुस् ।’ भनेर लेखेका छन् । त्यस्तै गायिका त्रीसला गुरुङ, कविता नेपाली, अभिनेता सुशील श्रेष्ठलगायतले समेत जसिताको पक्षमा कमेन्ट गरेका छन् ।
यता अनमोलको प्रेमिकाको बारेमा समेत ओसिनले उक्त कार्यक्रममा प्रश्न गर्छिन् । जसमा स्वस्तिमाले आना शर्मा र अस्मि श्रेष्ठको नाम लिन्छिन् । साम्राज्ञि अस्मिको नाम सुन्दा आस्चर्यमा पर्छिन् । तर, स्वस्तिमाले यथार्थ थाहा नभएको तर प्रश्नको जवाफ दिएको भनेर कुरा घुमाउछिन् । कार्यक्रमकि होस्ट सिटौलाले सुरुमै भन्छिन् ‘सुरज सिंह ठकुरीले ठूलो मायाको भारी बिसाएर जानू भाछ’ । तर, त्यो मायाको भारीमाथी ओसिनले अन्याय त गरिनन् ? यति स्तरिय शो होस्ट गर्दा पहिलो एपिसोड नै विवादित बनाउदै गर्दा सुरजले बिसाएको ठूलो मायाको भारी बोक्न पो सकिनन् कि ?
Discussion about this post