प्रदिपसंग जोडि बाँध्दै दिव्या रायमाझीले डेब्यु गर्ने फिल्म ‘एक्टर’को छायांकन सुरु

इटहरी/ अभिनेता प्रदिप खड्काको अभिनय रहने फिल्म ‘पुजार सार्की’ यहि आउँदो जेठको १० गतेबाट सार्वजनिक प्रदर्शनमा आउदैछ । ट्रेलर सार्वजनिक भएपछि उनको अभिनय कलाको खुबै तारिफ भैरहेको छ । फिल्म प्रदर्शनको नजिक आउदै गर्दा प्रोमोसनमा समय निकालेका खड्काले आजबाट फिल्म ‘एक्टर’को छायांकन सुरु गरेका छन् । फिल्मको पोखरा विन्ध्वासिनी मन्दिरमा पुजा गर्दै छायांकन सुभारम्भ गरिएको ‘एक्टर’ युनिटले जानकारी गराएको छ ।

फिल्मको शुभ मुहर्तमा प्रमुख कलाकार रहेका प्रदिप उपस्थित थिए भने नव-अभिनेत्री दिव्या रायमाझीको पनि उपस्थिति रहेको थियो । दिब्य र प्रदिपको फिल्ममा पहिलो सहकार्य मात्रै हैन दिब्याले यहि फिल्मबाट नेपाली चलचित्र उधोगमा अभिनेत्रीको रुपमा पाईला टेक्दैछिन् । अर्थात उनको पहिलो हिरो बनेका छन् प्रदिप खड्का । यी २ ले क्यामेरा पुजा गर्दै छायांकन सुरु गरेका हुन् । फिल्ममा आना शर्माको पनि प्रमुख भुमिकामा अभिनय रहने छ ।

केहि दिनअघि भैंसीपाटीस्थित कार्यविनायक मन्दिरमा बौद्दिक विधि अनुसार पूजापाठ पनि गरिएको फिल्मलाई राजन भुसालले निर्देशन गर्दैछन् भने अदृत फिल्मस् र मोती फिल्मस्को संयुक्त प्रस्तुतिमा बन्ने फिल्मको थमन कुमारी भण्डारी निर्माता हुन् । आउँदो तिहारलाई लक्षित गरेको फिल्म कार्तिक १५ गते लक्ष्मीपुजाको दिनबाट प्रदर्शन गर्ने तयारी समेत रहेको छ । १० दिन पोखराको छायांकन पछि एक महिना काठमाडौमा यो फिल्म ‘एक्टर’को छायांकन हुने बताईएको छ । फिल्ममा प्रदिप, आना र दिव्याको अलावा राजवल्लभ कोइराला, दिव्य देव, सुशील सिटौला लगायतका कलाकारहरुको पनि अभिनय रहनेछ ।