धरानमा ‘खजुरे ब्रो’को अनौठो शो, ‘ग्रान्ड प्रिमियर’को प्रचार गरेर ५ सय टिकट

इटहरी/ यहि शुक्रबार अर्थात बैशाख २८ गतेबाट सार्वजनिक प्रदर्शनमा आउने फिल्म ‘खजुरे ब्रो’ को धरानमा अनौठो तवरले प्रिमियर भएको छ । धरानमा अवस्थित फ्रेन्ड्स सिनेमाज हलमा २६ गते साँझ ७:३० बजे प्रिमियर शोको आयोजना गरिएको थियो । तर, ५०० टिकट शुल्क पनि राखिएको थियो । अर्थात प्रिमियर शो भनेर च्यारिटी शो गरेको पाईएको छ ।

चलनचल्तीमा प्रिमियर शोमा बिशिस्ट ब्यक्तीत्वलाई निमन्त्रणा गरेर नि:शुल्क फिल्म देखाईन्छ भने च्यारिटी शोमा कुनै संस्था वा परियोजनालाई सहयोग गर्ने भनी शुल्क निर्धारण गरेर गरिने गरिन्छ । तर, धरानमा आयोजना भएको च्यारिटी शोमा ‘ग्राण्ड प्रिमियर’ भनेर चर्चा, हल्ला र प्रचार गरियो तर, ५०० टिकट निर्धारण गरिएपछि झुक्क्याइएको बुझ्न सकिन्छ ।

धेरैजसो चलचित्रका न्युज लेख्ने पत्रकारलाई समेत प्रिमियरको बारेमा जानकारी नआएपछि यो विषयमा चासो बढ्दै गएको थियो । यसबारे फिल्मका मिडिया कोअर्डिनेटर रघुनाथ सापकोटासंग बुझ्दा आफुलाई यो विषयमा थाहा नभएको जानकारी गराए । आफुलाई धरान प्रिमियरको बारे जानकारी नभएको र फिल्म युनिट आफैले गरेको उनको भनाई छ ।