इटहरी/ तिनजना चक्लेटी अभिनेताहरु आर्यन सिग्देल, प्रदिप खड्का र पल शाहको अभिनय रहेको फिल्म ‘पुजार सार्की’ को ट्रेलर सार्वजनिक गरिएको छ । आउँदो जेष्ठको १० गतेबाट सार्वजनिक प्रदर्शनमा आउने फिल्मको ट्रेलर मंगलबार काठमाडौमा एक कार्यक्रमको आयोजना गरि सार्वजनिक गरिएको हो । ट्रेलर सार्वजनिक कार्यक्रममा अभिनेता पल शाह भने उपस्थित थिएनन् ।
सार्वजनिक ट्रेलरले अभिनेता प्रदीप खड्काको अभिनयको हाइप निकै बढेको बुझ्न सकिन्छ । उनले बोल्ने टोन र पात्रलाई न्याय गरेको देख्दा उनले निकै मेहनत गरेका छन् । ४ मिनेट लामो ट्रेलरमा जातीय विभेदले समाजका हरेक तह र तप्काका मानिसहरूलाई पारेको व्यक्तिगत, मानसिक र सामाजिक असरलाई उतारिएको छ। ट्रेलरमा अभिनेता पल शाहलाई समाज परिवर्तन गर्न अग्रसर युवाको भूमिकामा प्रस्तुत गरिएको छ । हेर्नुस् ट्रेलर ।
यी ३ अभिनेता आर्यन, प्रदिप र पल एकसाथ अभिनय गर्ने भन्ने खबर बाहिरिए देखि नै पुजार सार्की फिल्मको चर्चा निकै छ । यसअघि फिल्मको पोस्टर, टिजरसंगै २ गीतको भिडियो सार्वजनिक भैसकेको छ । सार्वजनिक गीतहरुको चर्चापनी उत्तिकै छ ।
दिनेश राउतले निर्देशन गरेको फिल्ममा अञ्जना बराईली, परिक्षा लिम्बु, लोकेन्द्र लेखक, तारा शर्मा, प्रेम सुब्बा, गोविन्द रमण पराजुली, राजेश बिसुराल, सुवास गजुरेल लगायत कलाकारहरूको पनि अभिनय रहेको छ । विकास सुवेदीको कथा लेखन ‘पुजार सार्की’मा रहेको छ भने सुवास भुषालले निर्माण गरेका हुन् । किङ्गडम नेटवर्कको ब्यानरमा बनेको यो फिल्मको गीतहरुमा प्रकाश सपूत, शान्ति श्री परियार, केतन क्षेत्री, देबेन्द्र बराल र मुना थटालले स्वर समावेश छ ।
Discussion about this post