इटहरी/ रोहित अधिकारीको निर्माणमा तयार भएको फिल्म ‘फर्की फर्की’ को ट्रेलर सार्वजनिक भएको छ । सुपरस्टार अनमोल केसीको प्रमुख अभिनय रहेको ट्रेलर सार्वजनिक पछि अधिकांशले अनमोलको तारिफ गरेका छन् । बिहीबार काठमाडौँमा एक कार्यक्रमको आयोजना गर्दै सार्वजनिक गरिएको ट्रेलरमा अनमोलले ‘सुपर पावर’ पात्रको भूमिका निर्वाह गरेका छन् ।
आउँदो जेठ १० गते रिलिज हुने यो फिल्मको ट्रेलरबाट फिल्ममा समय यात्राको कथा बोल्ने खुलासा भएको छ । यो फिल्ममा अभिनेत्री जसिता गुरुङको पनि प्रमुख भुमिका रहेको छ । ट्रेलर सार्वजनिक पश्चात् उनी अनमोलको प्रेमिकाको भुमिकामा रहेकी बुझ्न सकिन्छ । हेर्नुस् ट्रेलर ।
ट्रेलरमा अनमोलले आफुलाई भगवान् भनिरहेको देखिन्छ भने ‘फर्की फर्की’ निर्देशक सुयोग गुरुङका अनुसार यो फिल्म पहिलो ‘टाईम ट्राभल’ कथामा बनेको फिल्म हो । यो फिल्मबाट हलसम्म ‘फर्की फर्की’ हेर्न पुगेका दर्शकहरुले फरक स्वाद पाउने निर्माता रोहित अधिकारीले बताए ।
‘फेन्टासी जनर’मा निर्माण भएको यो फिल्म अनमोलको दस वर्षे फिल्मी करियरको दशौँ फिल्म हो । निर्माता रोहितले यो फिल्मलाई ओएसआर डिजिटलका ओम प्रकाश अग्रवालसँगको सहकार्यमा निर्माण गरेका हुन् । ‘फर्की फर्की’ मा अनमोल र जसिताको अलावा रवि काफ्ले, समृद्धि अर्याल, कृष्ण मल्ल, निर्मल शर्मा लगायतका कलाकारको समेत अभिनय रहेको छ ।
Discussion about this post