झापाको मेचिनगरमा नयाँ वर्ष २०८१ को अवसर पारेर बैशाख १ गते फिल्म ‘सुगुप’ प्रदर्शन हुँदै

इटहरी/ लिम्बू जातिमा प्रसव पिडा अथवा सुत्केरी ब्यथाको कारण ज्युँदो या मृत बच्चा जन्माउँदै गर्दा अथवा सुत्केरी कै कारण रगत बगेर मृत्यु हुने महिलालाई सुगुप भएको भन्ने चलनलाई प्रमुख कथा बनाएर निर्माण गरिएको फिल्म ‘सुगुप’को झापाको मेचिनगरमा विशेष शो प्रदर्शन गरिने भएको छ । किँरात याक्थुङ चुम्लुङ मेचिनगर समितिको आयोजनामा ‘सुगुप’को नयाँ वर्ष २०८१ को अवसर पारेर बैशाख १ गते प्रदर्शन गर्न लागेको हो ।

किँरात याक्थुङ चुम्लुङ मेचिनगर समितिकै सभा हलमा सुगुप दिउँसो १ बजेदेखी प्रदर्शन गरिने फिल्मका प्रमुख निर्माता रबिन कुमार नाल्बो लिम्बुले जानकारी गराए । फिल्म निर्माण युनिटले कोशी प्रदेशमा स्थानिय आयोजकको सहयोगमा सुगुपको विशेष शोलाई एकपछि अर्को गर्दै ठाउँठाउमा शो गरिरहेको छ । यसपछि दमक र बिर्तामोडमा बैशाख १५ गते प्रदर्शनको तयारी गरेको छ । सुगुपलाई लोकेन साँवा लिम्बूले लेखन तथा निर्देशन गरेका हुन् भने यसको प्रस्तुतकर्ता तथा मुख्य निर्माता रबिन कुमार नाल्बो लिम्बु हुन् ।

यो फिल्मको यसअघि देशबाहिर हङकङसहित नेपालको काठमाडौ, बिराटनगर, धरान, इटहरी लगायत ठाँउमा पनि भब्य प्रदर्शनी भैसकेको छ ।`सुगुप´मा लिम्बू संस्कृति तथा रितिरिवाजलाई रचनात्मक ढंगले प्रस्तुत गरिएको छ ।

चोकफुङ ईन्टरटेनमेन्ट प्रालीको ब्यानरमा निर्माण भएको फिल्ममा दिलमाया लाबुङ नाल्बो र सैलेन्द्र कुमार नाल्बो निर्मातासंगै एल पि साँवा, मनिसा नाल्बो, श्री प्रसाद माबो र राम प्रसाद पंधाक सह-निर्माताको रुपमा रहेका छन् । सुगुपमा वरिष्ठ कलाकार प्रेम सुब्बा, यासेली योङहाङ, फुलन्देको बाउ उपनामले परिचीत मौसम ईम्बुङ लिम्बू, बबीता नेयोङहाङ, सुम्नीमा खापुङ, रबीन कुमार नाल्बो, दिलमाया लाबूँग नाल्बो, शैलेंद्र क़ुमार नाल्बो, डम्बर कुमारी पोयाङ्बो मेन्याङ्बो, योमन सोदेम्बा, सागर केरुङ, रुकमा लिम्बू, निता लिम्बू, पन्ना आङबो, एम.के. योङहाङ, तीर्थ मादेम्बा, उदय बेघा, लिला सेत्लिङ माबो, ईन्द्रा पंधाक, युवराज ईश्बो, थानाहाङ तिगेला लगायतको अभिनय रहेको छ ।