इटहरी / चैत्र ९ गतेदेखि प्रदर्शन भइरहेको र राम्रो व्यवसाय गरिरहेको फिल्म ‘महाजात्रा’को गीत ‘मुरी मुरी साथी’ युट्युबमा सार्वजनिक भएको छ ।
सार्वजनिक गीतमा फडिन्द्र जोयश (रवीन्द्रसिंह बानियाँ)फडिन्द्र, (विपिन कार्की) र मुन्ना (रवीन्द्र झा) बिचको मित्रतालाई देखाइएको छ । फिल्ममा उनीहरुको जीवनमा शृंखलावद्ध रूपमा आउने उतारचढावसँगै उनीहरुको मित्रतालाई प्रस्तुत गरिएको छ
गीतमा तीन पात्रले जीविकोपार्जनका लागि गर्ने सङ्घर्ष, विभिन्न अवरोधमा टिकेको मित्रता र उनीहरूको गरिबीले डगमगाउन नसकेको नैतिकतालाई प्रस्तुत गरिएको छ । कालीप्रसाद बाँस्कोटाको स्वर तथा सङ्गीत रहेको गीतमा
हर्क साउदको शब्द छ ।
फिल्मको विषयवस्तु तीन पात्रकै वरिपरि घुमेको छ । आपत्कालीन रूपमा पैसा व्यवस्थापन गर्न आइपर्ने अवसर र त्यसको क्रममा तीन पात्रले गर्ने सङ्घर्ष देखाइएको फिल्ममा वर्षा राउत, दिव्य देव, अर्जुनजंग शाही, प्रकाश घिमिरे, राजाराम पौडेल, प्रवीण खतिवडा, सुमन कार्की, शिशिर बाङ्देल, गौमाया गुरुङ, अरविन खड्का लगायतको अभिनय छ ।
मनोरञ्जनसँगै राष्ट्रिय विषयलाई समेटिएको फिल्मलाई नेपाल कम्युनिस्ट पार्टी (एमाले) का अध्यक्ष तथा पूर्वप्रधानमन्त्री केपी शर्मा ओली, उपप्रधानमन्त्री तथा गृहमन्त्री रवि लामिछाने, पूर्वरानी कोमल राज्यलक्ष्मी शाह लगायतका विशिष्ट व्यक्तिले हेरिसकेका छन् । फिल्मले पहिलो तीन दिनमा चार करोड २६ लाखको ग्रस कलेक्सन गरिसकेको दाबी छ ।
यस फिल्मको लेखन तथा निर्देशन प्रदिप भट्टराईले गरेका हुन् भने फिल्मका कार्यकारी निर्माता रबिन्द्रसिंह बानिया हुन् । फिल्मलाई म्याक्स दीपेश खत्री र यज्ञश्वर पौडेलले संयुक्त रूपमा निर्माण गरेका हुन् ।
Discussion about this post