इटहरी / उपप्रधान तथा गृहमन्त्री रवि लामिछानेले आफ्नी श्रीमती निकिता पौडेलसंग आइतबार लबिम मलमा रहेको क्यूएफएक्स हलमा फिल्म ‘महाजात्रा’ हेरेका छन् । उनीहरुसंगै ‘महाजात्रा’ फिल्मका कार्यकारी निर्माता तथा अभिनेता रविन्द्रसिंह वानिया, अभिनेता बिपिन कार्कीले पनि संगै बसेर फिल्म हेरेका थिए । गृहमन्त्री लामिछानेले फिल्म हास्दा हास्दै रुने रुदारुदै हास्ने निकै रमाइलो र राम्रो बनेको प्रतिक्रिया दिएका छन् ।
उनले नेपाली फिल्म इन्डष्ट्रिमा सिमितता रहेकोले फिल्मलाई अन्तर्राष्ट्रिय रुपमा तुलना गर्न नहुने बताए । रविन्द्रसिंह बानियाँले फिल्ममा देखाइएको राजनैतिक कुराको बारेमा बताईदिनु भन्दा रविले ‘अबको समयमा राजनैतिक बिषयलाई यसरी देखाउने दिन नआऊने’ बताएका छन् । फिल्मको बारेमा बोल्दै गृहमन्त्री लामिछानेले आफू विपिन कार्कीको फ्यान भएकाले विपिनको अभिनयलाई जज गर्न नसक्ने बताउदै रमेश प्रसाइको कुरा स्मरण गराउदै मिल्ने भए फिल्म हेरिसकेपछि टिप्स दिन मनलाग्ने खालको फिल्म बनेको बताए ।
सेन्सर पासको बेला फिल्मकर्मीहरुलाई आउने समस्याको बिषयमा पत्रकारको प्रश्नमा उनले कलालाई जुनसुकै ढङ्गले प्रस्तुत गर्न पाउनुपर्ने र आफूले त्यसलाई सहजताका लागि कार्य गर्ने बताए । गत शुक्रबारदेखि प्रदर्शनमा आएको फिल्म ‘महाजात्रा’ले हलहरुमा उत्साहजनक दर्शक पाएकाे छ । सुरुकै दिनदेखि देशैभर उच्च शो पाएकाे महाजात्राले व्यापार पनि राम्रै गरेकाे छ । फिल्मले शुक्रबार १ करोड २३ लाख र शनिबार १ करोड ८३ लाख र आइतबार ४ करोड २६ लाख कलेक्सन गरेको छ ।
आइतबार होलीको दिन पनि यो फिल्म हेर्न हलमा दर्शकको चाप देखिएको थियो । आपतकालीन रुपमा आइपर्ने पैसा व्यवस्थापन गर्ने अवसर र त्यसले निम्त्याउने समस्यालाई रोचक शैलीमा प्रस्तुत गरिने फिल्ममा हरिवंश आचार्य, विपिन कार्की, रविन्द्रसिंह बानियाँ, वर्षा राउत, अर्जुनजंग शाही, प्रकाश घिमिरे, राजाराम पौडेल, प्रवीण खतिवडा, दिव्यदेव, सुमन कार्की, शिशिर वाङ्देल, गौमाया गुरुङ, अरविन खड्का लगायतको अभिनय रहेको छ । फिल्ममा म्याक्स दीपेश खत्री र यज्ञश्वर पौडेल निर्माता छन् ।
Discussion about this post