‘भ्वाइस किड्स’को फाइनल प्रतिष्पर्धामा रिजन डाँगी, जित्ने सम्भावना कति ?

इटहरी/ अदभूत गायन क्षमता भएका रिजन डाँगी अन्तर्राष्ट्रिय फ्रेन्चाईज टेलिभिजन गायन रियालिटी शो ‘द भ्वाइस अफ किड्स’ दोश्रो सिजनको फाइनलमा प्रवेश गर्न सफल भएका छन् । यतिबेला उनी आफ्नो गृहनगरमा भोट अपिल गर्दै प्रचारप्रसारमा ब्यस्त छन् । सुनसरीको इटहरी स्थायी घर भएका १२ वर्षीय डाँगीले परिकला न्युजसंगको कुराकानीका क्रममा फाइनलमा आफ्नो प्रतिष्पर्धी नभएको कुरा घुमाउरो शैलीमा सुनाए । हेर्नुस् उनीसंग गरिएको विशेष कुराकानी ।

शोको ब्लाईण्ड अडिसनबाटै अत्याधिक दर्शक श्रोताको मन जितिसकेका उनी कोच प्रमोद टिममा छन् । उनको लोकप्रियतासंगै गायन कलालाई हेर्ने हो भने भ्वाइस अफ किड्स दोश्रो सिजनको बिजेता रिजन नै हुन् । तर, रियालिटी शो भएका कारण हारजीतको रियालिटी भने अन्तिम चरणमा भोटले बताउनेछ । भोटको पछाडि भ्वाइसको केही नलाग्ने परम्परा नेपाली रियालिटी शोहरुमा चल्दै आइरहेको अवस्था छ । डाँगीले ब्लाईण्ड अडिसनमा ‘भाग्यमा खोट छ’ गीत गाउँदै चारै जना कोचलाई आफुतर्फ फर्काउन सफल भएका थिए । उपस्थित दर्शकको आग्रहमा सो गीत उनले पुनः दोहोर्‍याएर गाउनुपरेको थियो भने रिजनले सम्बन्धीत गायककै गीत गाएर आफ्नो कोच छानेका थिए ।

सबै कोचको नजरमा परेपनी ‘म बाँचेकै तिमीसँग माया लाउन हो’ गीत गाउँदै टिम प्रमोदलाई छानेका थिए । रिजन यसअघि भारतीय चर्चित बाल गायन रियालिटी शो ‘सारेगमप लिटिल च्याम्प्स’ मा पनि सहभागी भएका थिए । उनले भ्वाइस अफ किड्स दोश्रो सिजनमा गाएका गीतका भिडियो क्लिपहरु सामाजिक संजालमा भाईरल भैरहेका छन् । उनको स्वरको तारिफ गर्दै धेरैले दोश्रो सिजनको बिजेताको हकदार रिजन नै भएको सामाजिक संजालमा लेखेका छन् । हिमालय टेलिभिजनबाट हरेक शुक्रबार र शनिबार राति ८ बजे प्रसारण हुने ‘द भ्वाइस किड्स नेपाल’को दोस्रो सिजनमा गायक प्रमोद खरेल र सुशान्त केसी, गायिका मिलन नेवार र प्रविशा अधिकारी कोचका रुपमा रहेका छन् । यो शोको फाइनल प्रतिष्पर्धा यहि जेठको ५ गते हुँदैछ ।