इटहरी/ पछिल्लो समय फिल्ममा सर्वाधिक रुचाइएको जोडी दयाहाङ्ग राई र मिरुना मगर अभिनित फिल्म ‘मनसरा’ को टिजर सार्वजनिक भएको छ । सार्वजनिक टिजरमा फिल्मका प्रमुख कलाकारहरु दयाहाङ राई, मिरुना मगर, प्रविण खतिवडा र मेनुका प्रधानलाई देखाइएको छ । टिजर दर्शकलाई आकर्षित गर्ने खालको छ भने टिजर हेर्दा फिल्मले सामान्य मान्छेका सुन्दर कथा पर्दामा पेस गर्दैछ भनेर बुझ्न सकिन्छ । सार्वजनिक टिजरले नेवार पत्नी (मेनुका प्रधान)सँग विवाह गरेका ‘बाजे’(प्रविण खतिवडा) र ‘लिम्बुनी'(मिरुना मगर) छिमेकी रहेको देखिन्छ भने मिरुना एक छोराकि आमा भएको देखिन्छ । टिजरले ‘बाजे’की नेवार्नी श्रीमतीलाई आफ्ना पति छिमेकी ‘लिम्बुनी’सँग नजिक भएको मन नपरेको कुरा पनि देखाइएको छ ।
टिजरमा झोला बोकेर भौंतारिरहेका दयालाई एउटा महिला हराएकी सूचना टाँसिएको पोस्टरमा टक्क अडिएको अवस्थामा पेस गरिएको छ । क्लोजअपसटमा उनी लामो समयदेखि कसैको खोजीमा रहेको जस्ता देखिन्छन् । फिल्मले यी चार प्रमुख पात्रको अन्तरसम्बन्धको कथा पेस गर्ने टिजरबाट बुझ्न सकिन्छ । उपेन्द्र सुब्बा निर्देशित फिल्मले साधारण कथालाई रोचक बुनाइबाट पेस गर्न लागेको टिजरले देखाउँछ । हेर्नुस टिजर
टिजरमा कहिकतैं ‘मनसरा’को नाम उच्चारण गरिएको छैन् । ट्रेलर हेर्दा वैशाख २१ गते एउटा राम्रो फिल्मको आशा गर्न सकिन्छ । फिल्ममा दया, मिरुना, प्रविण तथा मेनुकाका अलावा हेमन्त बुढाथोकी, शान्ति गिरी, नेनहान राई लगायतको अभिनय रहेको छ । निर्देशक सुब्बाकै लेखन रहेको फिल्मका निर्माता छायाँकार शैलेन्द्र ध्वज कार्की हुन् । यस्तै, पर्शु अधिकारि, बिष्णु कुमार थेवे, जीवन लिम्बु थाक्लुंग सह-निर्माता हुन् । कबड्डी फिल्मस प्रोडक्सनको प्रस्तुतिमा निर्माण भएको फिल्मको छायांकारसमेत रहेका शैलेन्द्र कार्की निर्माता हुन् । ‘जारी’ फिल्मबाट तारिफ बटुलेका सुब्बाको यो फिल्मको रिलिजमिति घोषणा भएदेखि नै धेरैले पर्खिरहेका छन् । उपेन्द्र सुब्बा निर्देशित फिल्म‘जारी’ले नेपाली वक्सअफिसमा १७ करोड बढिको व्यापार गरेको थियो ।
Discussion about this post