४८ दिनमा सकियो ‘पुजार सार्की’को सुटिङ, फिल्मको कथामाथी पोखरामा संवाद

इटहरी/ ३ जना चकलेटी अभिनेताहरुले एकसाथ स्कृन शेयर गर्ने फिल्म ‘पुजार सार्की’ को छायांकन सम्पन्न भएको छ । कास्की जिल्लाको पोखरा नजिकै पर्ने कास्कीकोट र आसपासमा छायाङ्कन गरिएको फिल्म निर्माण युनिटले ४८ दिन लगाएर इन्डक्ल्याप गरेको हो । निर्देशक दिनेश राउतका अनुसार फिल्ममा समावेश गरिने कौडा गीत ‘दर्शन गरे हल्का निहुरिएर’ बोलको गीत अन्तिम छायांकन गर्दै फिल्म प्याकअप गरिएको हो । छायांकन सकिएको जानकारी दिँदै निर्देशक राउतले उक्त गीतमा फिल्मका प्रमुख कलाकारहरू पल शाह, आर्यन सिग्देल, प्रदीप खड्का, अन्जना बराईली र परीक्षा लिम्बू नाच्दै गरेको एक तस्वीर समेत सार्वजनिक गरेका छन् ।

यस्तै यहि फिल्ममा केन्द्रित भएर पोखरामा एक संवादको कार्यक्रम समेत सम्पन्न भएको छ । फिल्ममा उठान गरिएको बिषयवस्तुमाथि रहेर मिजार समाज नेपाल, गण्डकी प्रदेश समितिको आयोजनामा उक्त कार्यक्रम भएको हो । सोमबार आयोजना गरिएको उक्त कार्यक्रममा फिल्मका तर्फबाट फिल्मका प्रमुख कलाकार आर्यन सिग्देल, प्रदीप खड्कासंगै निर्देशक दिनेश राउत, लेखक विकास सुवेदी, निर्माता सुभाष भुसाल लगायतको उपस्थिति रहेको थियो ।

अन्तर्राष्ट्रिय जाति तथा रङ्गभेद उन्मुलन दिवसको सन्दर्भमा आयोजित कार्यक्रममा संविधान सभा सदस्य समेत रहिसकेका दिल बहादुर नेपाली, मिजार समाज पोखराका अध्यक्ष उमेश सिके लगायत उपस्थित थिए । संवादमा ‘पुजार सार्की’ले उठान गरेको अन्तरजातीय विवाह सम्बन्धी मर्मस्पर्शी सामाजिक कथालाई प्रमुख विषय बनाइएको थियो ।

संवादमा सहभागी अभिनेता आर्यन सिग्देलले जातिय विभेद गर्नु अन्ध विश्वास मात्र भएको बताए । अभिनेता प्रदीप खड्काले आफू काठमाडौंमा जन्मे हुर्केका कारण यस प्रकारका कथाहरू सुनेको भएता पनि पहिलो पटक भोगेको बताए । उनले आफूले अभिनय गरिरहँदा ‘मैत बहादुर’ पात्रभित्र नै प्रवेश गरेको हुँदा आफ्नै कथा जसरी नै अभिनय गरेको बताए । खड्काले जातका आधारमा हुने विभेद आजको युगमा सहनै नसकिने अपराध भएको बताउँदै यो विभेद हटाउन सबै चेतनसिल नागरिकबिच एकता हुन आबश्यक रहेको बताए ।

लेखक बिकास सुवेदीले आफ्नो आँखाले देखेको कथालाई चलचित्रको कथामा रुपमा रुपान्तर गरेको बताए । सो कार्यक्रममा चलचित्र यूनिटलाई सम्मान पनि प्रदान गरिएको थियो । यो फिल्म पुजार सार्कीलाई २०८१ सालको जेठ पहिलो साता सार्वजनिक प्रदर्शन गर्ने तयारी भैरहेको छ । किङडम नेटवर्कको ब्यानरमा निर्माण भैरहेको फिल्ममा विकास सुवेदीको लेखन रहेको छ भने निर्मातामा सुभाष भुषाल रहेका छन् । राजेश श्रेष्ठले छायांकन गरेको यो फिल्ममा प्रदिप, पल, आर्यन, अन्जना र परिक्षाको अलावा, मोहन निरौला, लोकेन्द्र लेखक, सुबास गजुरेल, विद्या कार्की, तारा शर्मा, प्रेम सुब्बा, शंकर आचार्य लगायतका कलाकारको समेत अभिनय रहेको छ ।