कपिल शर्माको सेटमा पुगे शोभित बस्नेत, गरे फिल्म प्रचार गर्न आग्रह

इटहरी/ भारतिय चर्चित कमेडियन कपिल शर्मासंग नेपाली फिल्मका निर्देशक शोभित बस्नेतले भेटघाट गरेका छन् । बस्नेत यतिबेला आफ्नो फिल्म ‘बद्री बहादुर’ प्रोमोसनमा छन् । यसै सिलसिलामा बस्नेतले केही समयअघि मुम्बई गएको मौका पारी बस्नेतले शर्मालाई भेटेको बताईएको छ । यतिबेला बस्नेतको शर्मासंग र शर्माको लोकप्रिय कमेडी कार्यक्रम ‘द कपिल शर्मा शो’को सेटमा बसेर खिचेको तस्वीर सार्वजनिक भएको छ ।

उनले उक्त तस्वीरहरुलाई आफ्नो सामाजिक संजाल फेसबुकमा शेयर गर्दै आफ्नो फिल्म ‘बद्री बहादुर’को प्रचारलाई कपिलले सहयोग गर्ने वचन दिएको लेखेका छन् । उता जय किशन बस्नेतले भने शर्माको टाउको राखेर ‘बद्री बहादुर’ को पोस्टर सार्वजनिक गर्न भ्याईसकेका छन् ।

चैत २३ गते सार्वजनिक प्रदर्शनमा आउने फिल्मको यो बिहिवार अर्थात चैत ८ गते ट्रेलर सार्वजनिक हुँदैछ । फिल्मको कार्यकारी निर्माता रवि अधिकारी हुन् भने गोपाल दलि प्रस्तुतकर्ता हुन् । मिथुन भोटे निर्माता रहेको बद्री बहादुरमा जय किसन बस्नेत, एलिना गुरुङ, छुल्ठिम गुरुङ, राजीव जंग बस्नेत, धिरेन शाक्य र वर्षा चौलागाईको मुख्य भूमिका रहेको छ । फिल्ममा पूजा शर्मा, सलोन बस्नेत र निर्देशक शोभित बस्नेत विशेष भुमिकामा रहेका छन् ।