इटहरी/ तामाङ रितिरिवाजमा निर्माण भएको फिल्म ‘चारदाम’मा समावेश ‘ए माया तिमी बिना’ बोलको गीत युट्युबमा सार्वजनिक गरिएको छ । लाखमान योन्जन तामाङको लेखन तथा निर्देशनमा कोशी भिजन फिल्मस् प्रा.लिको ब्यानरमा निर्माण भएको फिल्मको सार्वजनिक गीतमा दिपक लिम्बू र मुना थटालको स्वर रहेको छ ।
फिल्म निर्माण कम्पनी कोशी भिजन फिल्मस् प्रालीकै युट्युब च्यानलबाट सो गीतको भिडियोलाई फागुन १३ गते आइतबार सार्वजनिक गरिएको हो । गीतलाई पुर्ण लिम्बू र प्रेम कृष्ण बजगाईले संयुक्त रुपमा लेखेका हुन् भने संगीत गायक प्रेम कृष्ण बजगाईकै रहेको छ । हेर्नुस् भिडियो ।
सार्वजनिक गीतको भिडियोमा फिल्मका प्रमुख कलाकार सुवास योन्जन तामाङ र सुकुमाया तामाङ फिचर्ड छन् । यी २ लाई मनमोहक दृश्यमा रोमाण्टिक अवतारमा देखाइएको छ । चारदाम निर्माण युनिटले पछिल्लो समय यो फिल्मको विभिन्न ठाउँमा विशेष शो आयोजना गरिरहेको छ । इटहरीमा २ पटक भब्य विशेष शो प्रदर्शन गरेको फिल्मको धरान, पोखरा, भोजपुर र चक्रघट्टिमा सफल रुपमा विशेष शो आयोजना गरिएको छ ।
मोहन लोप्चन तामाङको प्रस्तुतिमा तयार भएको फिल्मलाई मैना घिसिङ, मदन बहादुर राई, पूर्ण लिम्बू, वर्षा राजभण्डारी तामाङले संयुक्त निर्माण गरेका हुन् । भोजपुर र सुनसरीको विभिन्न स्थानमा छायाङ्कन गरिएको फिल्ममा सुकुमाया मोक्तान तामाङ, सुवास योन्जन तामाङ, मदन राई, शान्ति पाख्रिन, पूर्ण लिम्बू, मोहन लोप्चन, मेनुका राई, डम्बर कुमारी लिम्बू, कान्छा लामा, बाल कलाकार सुम्निमा तामाङ लगायत कलाकारहरूको अभिनय रहेको छ । यो चलचित्र चारदाममा सुमन तामाङको छायाङ्कन तथा हेमन तामाङको सम्पादन रहेको छ भने अशोक मण्डलको शृङ्गार रहेको छ ।
Discussion about this post