इटहरी/ यहि फागुनको ११ गतेबाट देशव्यापी प्रदर्शनमा आउन लागेको फिल्म ‘गोर्खा वारियर’ को धरानमा ग्राण्ड रेड कार्पेट प्रिमियर सम्पन्न गरिएको छ । कोशी प्रदेशका मुख्यमन्त्री केदार कार्कीको प्रमुख आतिथ्यतामा आयोजना गरिएको रेड कार्पेट प्रिमियरमा धरानका नगरप्रमुख हर्क साम्पाङ, उप-प्रमुख आइन्द्र विक्रम बेघा लगायत विशिष्ट व्यक्तित्वहरुको उपस्थिति रहेको थियो ।
रेड कार्पेट प्रिमियर कार्यक्रम अघि विभिन्न भेषभुषामा सजिएर धरानेहरुले गोर्खा वारियरको ब्यानर बोकेर र्याली समेत गरेका थिए । धरानको छाताचोकबाट सुरु गरिएको र्यालिमा भानुचोक आईपुग्दा मेयर साम्पाङ समेत सहभागी भएका थिए । उनी भानुचोक देखी रेड कार्पेट प्रिमियर आयोजना गरिएको स्थान फ्रेन्डस् सिनेमाजसम्मै सहभागी भएका थिए । र्यालीलाई सशस्त्र प्रहरीको ब्याण्ड बाजा टोलिले नेपाली धुन बजाएर स्वागत सम्मान गरिएको थियो ।
प्रिमियर शोमा गोर्खा वारियर फिल्म हेर्न पुगेका आगन्तुक दर्शकहरुले फिल्म हल खचाखच भरिएको थियो । आगन्तुक दर्शकहरूले सिट नपाएर हलभित्रको भर्याङसमेत भरिएको थियो । फिल्म हेरेर निस्किएका दर्शकहरू प्रायःले फिल्मको बारेमा सकारात्मक प्रतिक्रिया दिँदै ११ गते सबै नेपालीलाई फिल्म हेर्न आग्रह गरे । आफ्नै कथा जस्तै लागेर भावुक भएको र आँशु थाम्न नसकेको उनिहरुको प्रतिक्रिया थियो । यता फिल्मको अन्त्यसम्मै बसेका मुख्यमन्त्री कार्कीले फिल्म हेरिसकेपछी ‘इतिहास फेरि ज्युदेको जस्तो लागेको’ जवाफ दिए ।
फिल्म अवधिभर धरानका मेयर साम्पाङसमेत थिए । फिल्म हेर्नुअघि ‘लाहुरेको शहरमा लाहुरेको फिल्म आएको’ भन्दै खुशी व्यक्त गरेका उनले फिल्म हेरिसकेपछी गोर्खा वारियरको खुलेरै तारिफ गरे । गोर्खा वारियरको धेरै दृश्यले आफ्नो मन छोएकोले आफुले फिल्म हेर्ने क्रममा रोएको बताए । पत्रकारसंग कुराकानिका क्रममा मेयर साम्पाङले फिल्मका निर्देशक मिलन चाम्सलाई बधाई दिए भने उनलाई महानिर्देशक समेत भएको बताए । बेलायत प्रिमियरका बेला आफू जान नपाएकोमा निर्देशक चाम्ससंग मेयर साम्पाङले माफी पनि मागेका छन् । यस्तै उनले प्रतिक्रिया दिने क्रममा अब धरानमा फिल्मको नीति नै बनाईएर नेपाली फिल्मलाई धरानमा सहयोग गर्ने बताए ।
मिलन चाम्स निर्देशित फिल्मको धरान रेड कार्पेट प्रिमियर शोमा चाम्स सहित निर्माता सुमन राई, कलाकारहरु रितेश चाम्स, रेविका गुरुङ, रियर राई, विजय लामा लगायत सहभागि थिए । नेपालमा पहिलोपटक प्रिमियर शो आयोजना गरेपस्चात निर्देशक चाम्सले धरानबाट सकारात्मक प्रतिक्रिया पाएको जानकारी गराए । उनी आगन्तुक अतिथी दर्शकहरुको उत्कृष्ट प्रतिक्रियाले उत्साहित भएका छन् । उनका अनुसार धरानको फ्रेन्ड्स सिनेमाजमा आज ६ गते आइतबारदेखी नै एड्भान्स बुकिङ खुल्ला गरिएको बताए । यसपस्चात गोर्खा वारियरको पोखरामा भोली ७ गते र काठमाडौमा ९ गते भव्य रेड कार्पेट प्रिमियर आयोजना गरिदैँ छ । फिल्मले ७० वर्षअघिको मलाया युद्धमा बेलायती सेनामा कार्यरत गोर्खाली सैनिकले लडेको बहादुरीपूर्ण लडाइको कथा बोल्छ ।
Discussion about this post