इटहरी/ निर्माण सम्पन्न भएर प्रदर्शनको लागी पालो कुरेर बसेको फिल्म ‘सतीदेवी’ले प्रदर्शन अगावै अवार्ड हात पारेको छ । लक्ष्मण सुवेदीको कथा, निर्देशन तथा निर्माणमा तयार भएको यो फिल्मले नगद ५० हजार सहित ‘सौराहा दक्षिण एसियाली चलचित्र महोत्सव २०८०’ मा सर्वोत्कृष्ट चलचित्रको उपाधी प्राप्त गरेको हो ।
यता यहि फिल्मबाट ‘शिव रेग्मी सर्वोत्कृष्ट चलचित्र निर्देशक’को उपाधी पनि निर्देशक लक्ष्मण सुवेदीले प्राप्त गरेका छन् । फिल्म प्रदर्शन अगावै एकसाथ २ अवार्ड आफ्नो फिल्मले पाउँदा फिल्मका लेखक, निर्देशक तथा निर्माता सुवेदी दङ्ग छन् । यो चलचित्र महोत्सवलाई माघ १८ गतेदेखि २२ गतेसम्म चितवनको सौराहामा क्याराभान नेपालले आयोजन गरेको थियो ।
यस्तै उक्त महोत्सव बाट नगद रु २५ हजार पुरस्कार सहित प्रदिप पोखरेलको निर्देशनमा तयार भएको ‘स्नो लियो पार्ड’ ले सर्वोत्कृष्ट लघु चलचित्रको उपाधी हात पारेको छ । महोत्सवमा दक्षिण एसियाली देशका ४० भन्दा बढी चलचित्रले सहभागिता जनाएको भएपनी २० वटा चलचित्र प्रदर्शन भएको थियो । महोत्सवबाट सर्वोत्कृष्ट सिनेमाटोग्राफरको उपाधी ‘चलचित्र ‘बिच्छेद’बाट संकल्प भुजेलले, सर्वोत्कृष्ट चलचित्र लेखनको उपाधी ‘चलचित्र‘बिच्छेद’बाटै सत्यराज चौलागाईले प्राप्त गरेका थिए ।
यता ‘जुरी इन्करेजमेन्ट अवार्ड’ रोशनकुमार श्रेष्ठद्धारा निर्देशित गीति चलचित्र ‘भाग्य’ले, सर्वोत्कृष्ट वृत्तचित्रको उपाधी डा. सचिन घिमिरे र गौरव केसीद्धारा निर्देशित चलचित्र ‘म अलप हुन चाहन्छु’ ले प्राप्त गर्दा सर्वोत्कृष्ट सम्पादकको उपाधी ‘नांगो गाउँ’बाट बनिशा शाहले प्राप्त गर्न सफल भएका छन् । महोत्सवको समापनमा बागमती प्रदेशकी सदस्य गीता गुरूङले सम्मान र नगद पुरस्कार हस्तान्तरण गरेकी थिइन् । चलचित्रको निर्णायक समितिको संयोजकमा वरिष्ठ वृत्तचित्र निर्देशक एवं सम्पादक लव प्याकुरेल रहेका थिए ।
Discussion about this post