‘दुखी आत्मा’ मा आँचल शर्मा, दयाहाङ राईसंग पुन: जोडी बाँधिदै

इटहरी/ लेखक तथा निर्देशक दीपेन्द्र लामाको नयाँ फिल्म ‘दुखी आत्मा’ मा हिरोइनको होला भन्ने कौतुहलता मेटिएको छ । निर्माण ब्यानर क्लकवर्क कृएसनले फिल्मको प्रमुख अभिनेत्रीमा आँचल शर्मालाई अनुबन्ध गरेको छ । स्क्रिप्टको माग अनुसार आँचललाई लिइएको निर्देशक लामाले बताए । अभिनेता दयाहाङ राई यसअघि नै अनुबन्धित भइसकेका छन् ।

यो फिल्ममा दयाको जोडीको रुपमा आँचल देखिनेछिन् । दयासंग आँचलको यो दोश्रो सहकार्य हो । यसअघि यी २ को जोडी ‘डिग्री माईला’ फिल्ममा बाँधिएको थियो । उक्त फिल्मको छायांकन भर्खरै सकिएको छ । ‘दुखी आत्मा’ का निर्देशक दीपेन्द्र र निर्माता हिमाल कडरियाले यसअघि निर्माण गरेको फिल्म ‘नाङ्गो गाउँ’ सुपरहिट भएको थियो । ‘दुखी आत्मा’ फिल्ममा उनीहरुको दोश्रो सहकार्य हो ।

यसपछि यही टिमले तेश्रो सहकार्य स्वरुप ‘नाङ्गो गाउँ-२’ निर्माण गर्ने घोषणा गरिसकेको छ । आगामी चैतमा छायांकन गरिने ‘दुखी आत्मा’ को स्क्रिप्ट लेखन कार्य अन्तिम चरणमा पुगेको छ । फिल्मका लागि अन्य कलाकार तथा प्राबिधिकहरु चयन कार्य केही समयमा गरिने जानकारी निर्माता हिमालले दिएका छन् । काठमाडौंको सेरोफेरोमा खिचिने सोसियल कमेडी जनराको फिल्मको बितरण आरआर फिल्मस्ले गर्नेछ ।