इटहरीमा ‘द अनटोल्ड स्टोरी’को प्रेस शो, हिरोबाट निर्देशनमा डेब्यु गरेका अयुबको तारिफ

इटहरी/ अभिनेताबाट निर्देशनमा डेब्यु गरेका अयुब केसी निर्देशित छोटो फिल्मको इटहरीमा प्रेस शो आयोजना गरिएको छ । अन्तर्राष्ट्रिय फिल्म फेस्टिभलहरुमा सहभागी गराउने उद्देश्य सहित निर्माण गरिएको ‘द अनटोल्ड स्टोरी’ नामक यो छोटो फिल्म जम्मा १० मिनेटको मात्रै रहेको छ । यो छोटो अवधिको सर्ट भएपनी फिल्मबाट २ ओटा कथा उठान गरिएको यसका लेखक तथा छायाँकार प्रकाश सुब्बाले बताए ।

द्वन्द्वका कथा र अन्धविश्वास भित्र रुमलिएका नेपाली समाज भित्रको एउटा विश्वासलाई सर्ट फिल्ममा कलात्मक ढङ्गले प्रस्तुत गरिएको छ । शुक्रबार इटहरीको सेन्ट्रल प्लाजामा अवस्थित ‘क्युएफएक्स सिनेफ्लेक्स’ मा ‘द अनटोल्ड स्टोरी’को वरिष्ठ रङ्गकर्मी, चित्रकार, मुर्तिकार तथा चलचित्र पत्रकार संघ नेपाल कोशी प्रदेश समितिका सल्लाहकार समेत रहेका विक्रम श्रीको प्रमुख आतिथ्यतामा प्रेस शो गरिएको थियो । उपस्थिति अतिथि तथा पत्रकारहरूले निर्देशक अयुब केसीको खुलेरै तारिफ गरे । अभिनय यात्रा संगै केसीको निर्देशकिय यात्रा पनि बलियो रहेको उपस्थित अतिथि तथा पत्रकारहरुको भनाइ थियो ।

सर्ट फिल्म ‘द अनटोल्ड स्टोरी’ मा २०५७ / ५८ सालतिरको सामाजिक परिवेशलाई उठाईएको निर्देशक केसीको भनाई छ । उनले सर्ट फिल्म निर्देशनमा डेब्यु गरेपनी यसअघि म्युजिक भिडियोहरु भने निर्देशन गरिसकेका छन् । उनका अनुसार हालसम्म ५० को हाराहारीमा म्युजिक भिडियो निर्देशन गरेको अनुभव छ । यो सर्ट फिल्ममा निर्देशक अयुबको पनि अभिनय छ भने उनका अलावा प्रेम सुब्बा, चन्दा ढुङ्गाना, केशव रायमाझी, कल्पना पाण्डे, ममता पौडेल, आइपी भट्टराई, बन्दना चौधरी, नारायण ल्वागुन आदि कलाकारहरुको पनि अभिनय रहेको छ । कोशी भिजन फिल्म्स प्राली इटहरीमा पोस्ट प्रोडक्सन भएको यो सर्ट फिल्मलाई हेमन तामाङले सम्पादन गरेका हुन् ।