‘मिसेस वर्ल्ड २०२४’मा सहभागी हुन अमेरिका उडिन् पृथ्वीया, ताज नेपाल ल्याउने लक्ष्य

इटहरी/ यही जनवरी १४ देखि जनवरी १९ सम्म अमेरिकाको लसभेगासमा आयोजना हुने ‘मिसेस वर्ल्ड २०२४’ मा नेपालको प्रतिनिधित्व गर्दै पृथ्वीया थापा अमेरिका प्रस्थान गरेकी छन् । २०२३ को ‘मिसेस वर्ल्ड नेपाल’ को ताज पहिरिएकी उनी शनिवार बिहान २ बजे अमेरिका प्रस्थान गरेकी हुन् । यसअघि काठमाडौमा पत्रकार सम्मेलन गरिएको थियो । सम्मेलनमा बोल्दै यसपटक मिसेस वर्ल्डको ताज नेपाल ल्याउने लक्ष्य सहित तयारी भएको उनले बताईन् ।

कोशी प्रदेशको इटहरी घर भएकी पृथ्वीयाको माईती काठमाडौ हो । उनले मिसेस वर्ल्डमा विश्वका ४० सुन्दरीहरु बिच प्रतिष्पर्धा गर्दैछिन् भने पृथ्वीयालाई सिधै सेमिफाइनलमा पुर्याउन भोटिङ पनि खुल्ला भैरहेको छ । जसको लागी मिसेस वर्ल्डको अफिसियल वेबसाईटमा जानुपर्ने हुन्छ । पृथ्वीयाले प्रतियोगितामा ‘नेसनल कष्ट्युम राउण्ड’मा पूर्वी नेपालको किराँत समुदायको संस्कृति झल्काउने ढाकाको पहिरन र गरगहना लगाउने छिन् ।

उनका अनुसार नेपालको हस्तकला सामग्री समेत लिएर त्यहाँ गएकी छन् भने जसमा काठको आकर्षक डिजाईन भित्र सगरमाथा अंकित तस्वीर कुँदिएको छ । त्यसलाई उनले मिसेस वर्ल्डमा प्रदर्शन गर्नेछिन् । मिसेस वर्ल्डमा नेपालले यो दोश्रो पटक सहभागीता जनाउदैछ । जसलाई नेपालमा हरेक वर्ष रिबन इन्टरटेनमेन्टले आयोजना गर्दै आईरहेको छ ।