फागुन २५ मा नेपाली फिल्महरुको भिडन्त: उपहार, काँडेतार र रङ्गेली मध्ये कस्ले मार्ला बाजी ?

इटहरी/ नेपाली फिल्म क्षेत्रमा कहिले फिल्म नै प्रदर्शन भैरहेको हुँदैन भने कहिले एकआपसमा जुधिरहेका हुन्छन् । यस्तैमा आगामी फागुन २५ मा नेपाली फिल्महरुको राम्रै भिडन्त देखिने भएको छ । उक्त मितिमा ‘उपहार’, ‘काँडेतार’, ‘रङ्गेली’ र ‘लोकल हिरो’ले आफ्नो प्रदर्शन मिति तय गरेको छ । यी मध्ये लोकल हिरोको सो मितिमा प्रदर्शन हुने सम्भावना छैन । कारण, यो फिल्म छायांकन नै भएको छैन् ।

अन्य ३ फिल्मले आ-आफ्नो अडान सहित टिजर, गीत तथा पोस्टर सार्वजनिक गर्दै प्रचारप्रसारलाई बाक्लो बनाउदैछ । यता काँडेतारले त देशव्यापी रुपमा विशेष शो नै गर्दै फागुन २५ गतेको प्रचारप्रसार गरिरहेको छ । आफुले अन्य फिल्म भन्दा अगाडि प्रदर्शन मिति तय गरेकोले काँडेतारका कलाकार तथा निर्देशक नवल खड्का पछाडी हट्ने पक्षमा छैनन् । उनले फिल्मलाई डिजिटल प्रचारप्रसार स्वरुप ‘सके जोबन दिम्ला मुया’ बोलको गीत सार्वजनिक गरेका छन् ।

यता उपहार पनि बैशाखबाट अगाडि सरेको फिल्म भएकोले यो फिल्म पनि निर्धारित मितिमै प्रदर्शन हुने पक्कापक्की छ । उपहार निर्माण युनिटले पनि प्रचारप्रसारलाई बाक्लो बनाउदै गैरहेको छ । केहिअघि यो फिल्मको ‘मुटुको चार आना’ बोलको गीत सार्वजनिक गरिएको थियो । यता रङ्गेलीले पनि सोही मितिलाई नै तार्गेट गरेर फिल्मका क्यारेकटर पोस्टरहरु सार्वजनिक गरिरहेको छ भने अब प्रचारप्रसारलाई आक्रमक बनाउने तयारिमा निर्माण युनिट छ ।

फिल्मका निर्देशक अर्जुन सुवेदीका अनुसार आधा दर्जनबढी प्रचारप्रसारका सामग्री तयार गरिदैँ छ । निर्माण युनिटले माघ १ गते अफिसियल इन्ट्रो टिजर सार्वजनिक गर्ने तयारी गरेको छ भने त्यसपछि एक विवाह गीत र अर्को आईटम गीत र ट्रेलर सार्वजनिक गर्ने निर्देशक अर्जुनले बताए । जे होस्, यो भिडन्त रोचक हुने देखिन्छ । त्यसै पनि त्यो दिन शिवरात्री । रोचक माथी अझै रोचक र रौनक यी फिल्महरुले थप्नेछन् । सबै फिल्म हिट हुने शुभकामना ।