पुर्बेली फिल्म क्षेत्रमा नयाँ ट्रेन्ड – ‘विशेष शो’, क-कस्ले पछ्याउँदै छन् यो ट्रेन्ड ?

इटहरी/ सिनेमाको नजरले हेर्ने हो भने पछिल्लो समय कोशी प्रदेशमा नयाँ ट्रेन्ड सुरु भएको छ । सायदै यो ट्रेन्डको यत्तिका चहलपहल अन्य ठाउँमा छैन होला । त्यो ट्रेन्ड हो, भाषागत वा संस्कार संस्कृतिको कथामा फिल्म निर्माण गर्यो अनि लगानी उठाउन विशेष शो ठाउँ-ठाउमा गर्यो । यस्तै भाषागत भन्दा बाहिरका फिल्महरुको पनि विशेष शो चलिरहेको छ । यो ट्रेन्ड अहिले कोशी प्रदेशको पनि विशेषगरी धरान र इटहरीमा खुबै मौलाएको छ । जस्ले गर्दा यो ठाउँमा चलचित्रनगरी चलायमान देखिन्छ । देशव्यापी रिलिज हुने फिल्म चलोस् नचलोस् तर, यहाँ भने, जस्ता फिल्म पनि विशेष शोको नाममा चलेकै छन्, अझ भनौं हाउसफुल नै हुन्छन् ।

यो ट्रेन्ड पछ्याउँनेमा अगाडि आउँछन् लेखक, निर्माता, निर्देशक तथा कलाकार लाखमान योन्जन तामाङ । उनले आफ्नै कम्पनी कोशी भिजन फिल्मस प्रालीको ब्यानरबाट फिल्म बनाउछन् । फिल्म बनाउन सबैभन्दा सजिलो उनैलाई छ । सम्पुर्ण प्राविधिक सामग्री सहित उनको पुरै परिवार नै यहि क्षेत्रमा भएको कारण अरुलाई भन्दा उनलाई फिल्म बनाउन सहज छ । लाखमानले पछिल्लो समय तामाङ जातिको संस्कार, संस्कृति र पहिचानलाई समावेश गरेर ‘अभियान’ र ‘चारदाम’ नामक २ ओटा फिल्म निर्माण गरिसकेका छन् । देशव्यापी रिलिजमा भन्दा पनि उनी विशेष शोमै यो फिल्महरुलाई दौडाईरहेका छन् ।

इटहरी, धरान, काठमाडौ लगायतका ठाउँहरुमा अभियानको विशेष शोहरु गरेका उनले अझै केही ठाउँमा शो गर्ने मनसाय बनाएका छन् । तर, हालै निर्माण गरेको ‘चारदाम’ फिल्ममा लाखमान केन्द्रित भैरहेका छन् । इटहरीमा विशेष शो हाउसफुल भएपछि उनले ‘चारदाम’को चक्रघट्टि र पोखरामा विशेष शो सम्पन्न गरेका छन् । यता यहि ट्रेन्डलाई पछ्याउँदै निर्देशक बिजय सुब्बाले पनि ‘हाङनान्द’ फिल्म बनाए । उनले पनि सो फिल्मको देशव्यापी रिलिज गराउने तर्फभन्दा विशेष शोमै ध्यान केन्द्रित गरे । नेपालमा धरान, इटहरी लगायतका ठाउँहरु संगै हङकङमा समेत ‘हाङनान्द’को विशेष शो हाउसफुल गराए । उनले ‘हाङनान्द’ फिल्ममा लिम्बू जातिको याक्थुङ मुन्धुममा आधारित लिम्बुहरुको महत्त्वपूर्ण बाजा ‘च्याब्रुङ’ को उत्पती र यसको विशेषताको बारेमा प्रस्ट्याउने जमर्को गरेका थिए । निर्देशक सुब्बाले पन्धाक फिल्मस् प्रोडक्सनको ब्यानरमा यो फिल्म नेपाली भाषामै निर्माण गरेका थिए । त्यसैगरी निर्माता, निर्देशक तथा कलाकार अरुण कुमार प्रधान पनि यहि लहरमा छन् । उनले पनि आफुले निर्माण तथा निर्देशन गरेको फिल्म ‘१२ नेपालि एक चिहान’लाई बिशेष शोको नाममा प्रदर्शन गरिरहेका छन् । उनले धरान, झुम्का लगायतका ठाउँहरुमा केहिसमय अघि बिशेष शो गराएका थिए । इराकमा मारिएका १२ नेपालीको सत्य घटनामा यो फिल्मलाई निर्माण गरिएको छ ।

सुनसरीको झुम्कामा म्याजिक सिनेमा हल संचालन गरिरहेका पर्शुराम चौधरी पनि यो ट्रेन्ड पछ्याउँनेमा पर्छन् । उनलाई पनि फिल्म निर्माणमा लाखमान योन्जनलाई सहज भएझै फिल्म चलाउनमा सहज छ । उनले आफ्नो फिल्म ‘जितिया-२’ को बेला बेला आफ्नै फिल्म हलमा विशेष शो गरिरहन्छन् । यो फिल्मलाई उनले थारु रितिरिवाजमा रहेर निर्माण गरेका छन् । यस्तै यो ट्रेन्डलाई पछ्याउँन थालेका अर्का निर्माता, निर्देशक तथा कलाकार हुन् भिम लामा । उनले पछिल्लो समय ‘लिलामे माईला’ फिल्म बनाएर ठाउँ ठाउँमा विशेष शो आयोजना गर्दै हिडिरहेका छन् । धरान र इटहरीमा विशेष शो गरे पश्चात् उनले यो फिल्मको बिराटनगरमा पनि विशेष शो सम्पन्न गरेका छन् भने बिराटचोक र चक्रघट्टीमा विशेष शो गर्दैछन् । उनले आफ्नो फिल्म निर्माण कम्पनी भिम लामा फिल्मस प्रालीबाट प्रस्तुत गरिएको यो फिल्ममा ३ जातीको प्रेम कथा र विवाह रितसम्मका कुरालाई उठाएका छन् ।

त्यसैगरी कोशी प्रदेशमा विशेष शोको ट्रेन्डलाई पछ्याउँदै फिल्म काँडेतार पनि प्रदर्शन गरियो । इटहरीमा यो फिल्मको एकदिनमा एक शो हैन ३ शो नै विशेष शोको रुपमा देखाईयो । नेपाल र भारतको सिमानामा काँडेतार लगाउनुपर्छ भन्ने अभियानसहितको सन्देश फैल्याउने उद्देश्यले निर्माण गरिएको यो फिल्मको इटहरीसंगै उदयपुर, धरान र बिराटनगर सहित देशव्यापी रुपमै विशेष शो चलिरहेको छ । यता लिम्बु संस्कार, संस्कृतिलाई समेट्दै निर्माण गरिएको नेपाली कथानक चलचित्र ‘युप्पारुङ’ले पनि यहि ट्रेन्डलाई नै फलो गरेको भन्ने बुझ्न सकिन्छ । सागर सिङ्गल अन्छङ्बोको निर्माण तथा रविन श्रेष्ठको कथा र निर्देशनमा तयार भएको यो फिल्मको धरानमा हालै विशेष शो आयोजना गरिएको छ । यो फिल्म पनि नेपाली भाषामै तयार गरिएको हो ।

यता भर्खरै छायांकन सकिएको र अहिले पोस्ट प्रोडक्सनमा रहेको लिम्बू संस्कृतीमा आधारित सर्ट फिल्म ‘कुमाक्ला फाक’ को पनि विशेष शोको तयारीमा रहेको बुझ्नमा आएको छ । थिएटर साहारा धरानको दोश्रो प्रस्तुती स्वरुप निर्माण गरिएको यो सर्टफिल्मको कथा, पटकथा तथा निर्देशन नविन मेन्याङबोको रहेको छ । यो सर्टफिल्म कुमाक्ला फाकमा लिम्बु जाती र सुंगुरसंगको परम्परागत सम्बन्ध र त्यसमा आएको उतारचढावलाई उठान गरिएको छ । यता यहि आउँदो माघ १५ गते लिम्बू सँस्कारमा आधारित नेपाली कथानक चलचित्र सेमे:वा ( सिफ्यु चरा ) को विशेष शो हुने हुने भएको छ । त्यसपस्चात अन्य ठाउँहरुमा समेत यो फिल्मको विशेष शो आयोजना गर्ने फिल्म निर्माण युनिटको तयारी छ । यो फिल्मको लेखक दिलिप फुरुम्बो हुन् भने उनैले निर्देशन गरेको यो फिल्मको कार्यकारी निर्माता पनि दिलिप नै हुन् । यस्तै लिम्बु संस्कार सस्कृतीमा आधारित नेपाली कथानक चलचित्र ‘युक्पुङ’ अर्थात (बस्ती) को पनि केहिअघि विशेष शो गरिएको थियो । यो फिल्मको धरानमा ३ शो गरिएको थियो भने ३ शो नै हाउसफुल भएको थियो । यो फिल्मलाई दिनेश माङ्मुले निर्देशन गरेका हुन् ।

यी लगायत अन्य फिल्महरुले पनि यो ट्रेन्डलाई पछ्याउँदै विशेष शो गरिरहेका छन् । केहीसाता अघि लोकप्रिय अभिनेत्री मलिका महत अभिनित फिल्म ‘सतिदेवी’ पनि कोशी प्रदेशमा पहिलोपटक विशेष शो गरिने भनिएको थियो । त्यसको लागी धरानमा चलचित्र पत्रकार संघ नेपाल सुनसरी शाखा र दमकमा चलचित्र पत्रकार संघ नेपाल झापा शाखाले तयारी पनि गरेको थियो । तर, मौसम खरावीका कारण निर्माता निर्देशक लक्ष्मण सुवेदी तथा अभिनेत्री मलिका महत आउन नसकेपछि यी दुबै ठाउको विशेष शो रद्ध भएको थियो ।