इटहरी/ अदभूत गायन क्षमता भएका रिजन डाँगी अन्तर्राष्ट्रिय फ्रेन्चाईज टेलिभिजन गायन रियालिटी शो ‘द भ्वाइस अफ किड्स’ दोश्रो सिजनको सेमिफाइनलमा प्रवेश गर्न सफल भएका छन् । सुनसरीको इटहरी स्थायी घर भएका १२ वर्षीय डाँगीले फिल्म ‘प्रियसी’को उदित नारायण झाले गाएको ‘सय डाँडा काट चाहे’ बोलको गीत गाउँदै सेमिफाइनलमा प्रवेश गरेका हुन् । शोको ब्लाईण्ड अडिसनबाटै अत्याधिक दर्शक श्रोताको मन जितिसकेका उनले कोच प्रमोदबाट राम्रो तारिफ पाए ।
डाँगीले ब्लाईण्ड अडिसनमा ‘भाग्यमा खोट छ’ गीत गाउँदै चारै जना कोचलाई आफुतर्फ फर्काउन सफल भएका थिए । उपस्थित दर्शकको आग्रहमा सो गीत उनले पुनः दोहोर्याएर गाउनुपरेको थियो भने रिजनले सम्बन्धीत गायककै गीत गाएर आफ्नो कोच छानेका थिए । सबै कोचको नजरमा परेपनी ‘म बाँचेकै तिमीसँग माया लाउन हो’ गीत गाउँदै टिम प्रमोदलाई छानेका थिए ।
रिजन यसअघि भारतीय चर्चित बाल गायन रियालिटी शो ‘सारेगमप लिटिल च्याम्प्स’ मा पनि सहभागी भएका थिए । उनले भ्वाइस अफ किड्स दोश्रो सिजनमा गाएका गीतका भिडियो क्लिपहरु सामाजिक संजालमा भाईरल भैरहेका छन् । उनको स्वरको तारिफ गर्दै धेरैले दोश्रो सिजनको बिजेताको हकदार रिजन नै भएको सामाजिक संजालमा लेखेका छन् । हिमालय टेलिभिजनबाट हरेक शुक्रबार र शनिबार राति ८ बजे प्रसारण हुने ‘द भ्वाइस किड्स नेपाल’को दोस्रो सिजनमा गायक प्रमोद खरेल र सुशान्त केसी, गायिका मिलन नेवार र प्रविशा अधिकारी कोचका रुपमा रहेका छन् ।
Discussion about this post