दयाहाङ र मिरुनाको ‘घरज्वाइँ’ असार २८ गतेबाट प्रदर्शनमा आउने

इटहरी/ केहि समयअघि दयाहाङ राई र मिरुना मगरलाई अनुबन्ध गरेर चर्चामा आएको फिल्म ‘घरज्वाइँ’ निर्माण युनिटले फिल्मको प्रदर्शन मिति सार्वजनिक गरेको छ । ‘घरज्वाइँ’को निर्माता जनक घर्ती मगरले शुक्रवार सामाजिक संजालमा एक टाईटल पोस्टर सार्वजनिक गर्दै यो फिल्मलाई आउँदो २०८१ सालको असार २८ गते प्रदर्शन गर्ने घोषणा गरेका हुन् ।

पछिल्लो समय फिल्म बनाउने घोषणा गर्दैगर्दा नै रिलिज मिति तय गर्ने परम्परा छ । त्यसैलाई फलो गर्दै घरज्वाइँ’ युनिटले फिल्म छायांकनमा ननिस्किदै आफ्नो प्रदर्शन मिति तय गरेको हो । पछिल्लो समय दया र मिरुनाको जोडि हिट छ । यी २ लाई आफ्नो फिल्ममा लिन निर्माता निर्देशकको होडबाजी नै छ । मिरुना र दयाको अनुहारले लगानी सुरक्षीत हुने विश्वास चलिआएको छ ।

अनिल बुढा मगरले निर्माण गर्ने यो फिल्म ‘घरज्वाइँ’मा दया र मिरुनाको अलावा बुद्धि तामाङ, पुष्कर गुरुङ, शिशिर बाङ्देल, कविता आले, राज थापा, शिला आले, अनु थापा, बिना थापा मगर, खबपु पुनको पनि अभिनय रहनेछ । मगर समुदायको विवाह परम्परामा आधारित रहेर बन्ने यो फिल्म ‘घरज्वाइँ’लाई आउँदो माघको तेश्रो साताबाट पूर्वी रुकुमको तकसेरामा छायांकन गर्ने तयारी निर्माण युनिटले गरेको छ । जिएम मुभिज प्रोडक्सनको प्रस्तुतिमा बन्ने फिप्म ‘घरज्वाइँ’को कथालाई निर्देशक मगरसंगै विनोद खतिवडा र सुभाष कोइरालाले तयार गरेका हुन् ।