दयाहाङ राई र मिरुना मगर अभिनित फिल्म ‘नांगो गाउँ’ भदौ २९ गते प्रदर्शन हुने

इटहरी/ एकपछि एर्को हिट ब्लकबस्टर फिल्म दिइरहेको जोडि दयाहाङ राई र मिरुना मगरको अर्को नया फिल्मको प्रदर्शन मिति सार्वजनिक गरिएको छ । छायांकन सम्पन्न भैसकेको फिल्म ‘नांगो गाउँ’को प्रदर्शन मिति घोषणा गरिएको हो । यो फिल्म आगामी तीजलाई लक्षित गर्दै भदौ २९ गतेदेखि प्रदर्शनमा आउने भएको छ । अब यो मितिमा अर्को कुनै फिल्म निर्माता-निर्देशकले प्रदर्शन गर्ने तयारीमा छन् भने एकपटक ठन्डा दिमागले सोच्न पर्ने भएको छ ।

किनकी दया र मिरुना एउटा बिकाउ ब्राण्ड बनिसकेको छ । जसको ज्वलन्त प्रमाण हो ‘कबड्डी ४’ र ‘जारी’ । ‘नांगो गाउँ’ निर्माण युनिटले एक पोस्टर सार्वजनिक गर्दै फिल्मको मिति तय गरेपनी पोस्टरमा कुनै पनि पात्रलाई अटाएका छैनन् । एक बस्तिलाई नेपथ्यमा पार्दै केही महिला तथा पुरुषको जमात झण्डा बोकेर कतै हिडिरहेका छन् । यो देख्दा फिल्मको कथासार राजनैतिक पृष्ठभुमिमा रहेको छ ।

दीपेन्द्र लामाको निर्देशनमा बनेको ‘नांगो गाउँ’ मा अर्कि लोकप्रिय अभिनेत्री साम्राज्ञि राज्य लक्ष्मी शाहको पनि अभिनय रहेको छ । तर, उनी दया र मिरुनाको कारण ओझेल पर्ने प्रवल सम्भावना छ । फिल्ममा हिमाल शर्माको प्रस्तुती, जय श्रेष्ठको निर्माण तथा फिल्ममा समावेश गरिएको कथा निर्देशक लामाले नै तयार पारेका हुन् । दया, मिरुना, साम्राज्ञिसंगै फिल्ममा कर्मा, शिशिर वाङ्देल, बुद्धि तामाङ, रविन्द्र झाको पनि मुख्य भुमिकामा अभिनय रहेको छ ।