इटहरी/ विश्वका ठूला फिल्म फेस्टिभल सहभागिता जनाएको नवीन सुब्बा निर्देशित फिल्म ‘गाउँ आएको बाटो : अ रोड टु भिलेज’ ले नेपाल प्रदर्शन तय गरेको छ । क्यानडाको टोरन्टो फिल्म फेस्टिभलमा विश्व प्रिमियर भएको यस फिल्ममा दयाहाङ राई, प्रसन राई र पशुपति राईको शीर्ष भूमिका देखन सकिन्छ । त्यसपछि दक्षिण कोरियाको बुसान, भारतको मुम्बई फिल्म फेस्टिभलमा स्क्रिनिङ भैसकेको छ ।
फिल्मको निर्माता कम्पनी बाँसुरी फिल्म्सले हल प्रदर्शनका लागि मेन्छयम पिक्चर्ससँग सहकार्य गर्दै विसं २०८१ जेठ १८ मा प्रदर्शन मिति तय गरेको छ । फिल्मले आमाबाबु र सन्तानबिचको सम्बन्धको चित्रण साथै अवसर र आधुनिकताले कसरी परिवारका सदस्यबीचको सम्बन्धलाई असर पार्छ र सडक पुगेपछि बाबु र छोराबीचको सम्बन्धमा आउने उतारचढावको कथा पेश गर्छ ।
सामुदायिक लगानीको अवधारणामा निर्माण भएको यो फिल्मलाई भोजपुर, संखुवासभा र धरानमा फिल्मको छायांकन गरिएको हो । ‘नुमाफुङ’ रिलिज भएको २२ वर्षपछि र ‘गुडबाइ काठमाण्डू’ बनेको ६ वर्षपछि ‘गाउँ आएको बाटो’ तयार भएको हो ।
नवीन सुब्बा र आमोद राई को निर्माता रहेको यस फिल्ममा महेश राई र निर्देशक सुब्बाले पटकथा लेखेका हुन् । फिल्ममा अमेरिकी सिनेम्याटोग्राफर जोस हेरमको छायांकन, क्वान पंग लिउङको सम्पादन, हेइदी लीको संगीत छ ।
Discussion about this post