‘सतीदेवी’ फर्स्टलुक: मलिकालाई कालोमोसो दलेर जुत्ताको माला, किन लखेट्दैछन् गाउँले ?

इटहरी/ लक्ष्मण सुबेदीको लेखन, निर्माण तथा निर्देशन रहेको फिल्म ‘सतीदेवी’को फस्टलुक पोस्टर सार्वजनिक गरिएको छ । निर्देशक सुवेदीको दिलासा कृएसनबाट निर्माणको आधारमा यो दोश्रो फिल्म हो भने निर्देशनको आधारमा ‘सतीदेवी’ तेश्रो फिल्म हो । सार्वजनिक पोस्टरमा फिल्मको मुख्य भूमिकामा रहेकी नायिका मालिका महतलाई फिचर्ड गरिएको छ । सार्वजनिक पोस्टरमा अभिनेत्री मलिकालाई घाटीमा जुत्ताको माला र अनुहारमा कालोमोसो दलेर गाउलेहरुले लखेट्दै गरेको देखिन्छ । यसले गर्दा फिल्मप्रती चासो अझै बढेको छ ।

सार्वजनिक पोस्टरमा ‘ईश्वरको उपहार, सृष्टि धान्छन्, होइनन् कर्महारा छोरी बुझौं, छोरी पुजौँ, यिनै संसार सारा…’ भनेर लेकिएको छ । जसले गर्दा यो फिल्म नारी प्रधान हो भन्न सकिन्छ । फिल्ममा निर्देशक सुबेदीले सामाजिक कथालाई सुक्ष्म रुपमा देखाउन खोजेको फर्स्टलुकबाट आँकलन गर्न सकिन्छ । गोल्डेन स्टेट मुभी मेकर्स एलएलसी क्यालिफोर्नियासंगको सहकार्यमा निर्माता तथा निर्देशक लक्ष्मणको कम्पनी दिलासा कृयसन प्रालीको प्रस्तुतीमा यो फिल्म निर्माण भएको हो । फिल्मको निर्माताका रुपमा श्रीदेवी सुवेदी रहेकि छन् भने यो फिल्मलाई निर्देशक सुवेदीले स्वर्गबासी आमा तेजकुमारी र बा भक्तीराम सुवेदीमा समर्पित गरेका छन् ।

निर्देशक सुवेदीका अनुसार यो फिल्म ‘सतीदेवी’ बिशुद्ध मौलिक नेपाली समाज, जनजीवन र परिबेशको माटोबाट अन्तर हृदयमा कुदिएको यथार्थ कथा हो । कथा मात्रै होइन यो आम ब्यथा समेत हो । उनी भन्छन् ‘यो फिल्मलाई धार्मिक, पौराणिक कथा तथा पात्रमा बनेको होला भन्ने बुझाई रहेछ, जो पुर्णरुपले गलत छ । ‘सतीदेवी’को कुनैपनी धर्म, जाती, सम्प्रदाय, परम्परा र कालखण्ड तथा ब्यक्तिसँग यसको कुनै प्रकारको सम्बन्ध छैन ।’ फिल्मको बारेमा थप प्रष्ट पार्दै सुवेदीले बाबु र छोरीहरु बीचको मिहीन स्नेह र सम्बन्धको आरोहअवरोह तथा समाजको सतही अनि कुसोचको प्रक्षेपण प्रस्तुत गरिएको बताए ।

उनले यो फिल्म ‘सतीदेवी’ उत्कृष्ट बनेको समेत दावी गरे । उनले भने ‘सतीदेवी’ चल्ने चित्र मात्रै होइन, हेर्ने चलचित्र मात्रै नि होइन, २ घन्टा १५ मिनेट लामो निर्जीव `रिल´ प्राणयुक्त छ । यसले आम हृदयको अनन्त गहिराइसम्म पुगेर जीवनको यथार्थता महसुस गराउन सक्ने सामर्थ्य राख्छ भन्ने बिश्वास मेरो छ ।’ पोस्टर सार्वजनिक भएपनी फिल्मको सार्वजनिक प्रदर्शन मिति भने सार्वजनिक गरिएको छैन ।

निर्देशक सुवेदीका अनुसार यो फिल्मलाई नेपालका विभिन्न ठाउँमा च्यारिटी शोको रुपमा समेत प्रदर्शन गरिने छ । ‘सतीदेवी’मा नायिका महतसंगै हर्सिका ओली, मन्जिला बानियाँ, सन्दिप बाबु लोहनी, रमेश बुढाथोकी, कुलदिप अधिकारी, भोला सापकोटा, सिर्जना अधिकारी लगायत कलाकारहरुको अभिनय रहेको छ । यो फिल्मलाई बाबु श्रेष्ठले छायांकन गरेका हुन् । ‘सतीदेवी’मा तारा थापाको सम्पादन, दिपक शर्मा र सुवाष थापाको संगीत, राम जी लामिछानेको कोरियोग्राफी र देव महर्जनको एक्सन रहेको छ ।