तेश्रो हप्तामा ‘दिमाग खराब’, अबदेखी सबै फिल्मको ५०-५० प्रतिशत शेयर बाँडिने

इटहरी/ गएको कार्तिक २४ गते हलमा रिलिज भएको दिमाग खराब गत हप्तादेखि मध्य पूर्वी मुलुकहरूमा समेत प्रदर्शन भैरहेको छ भने नेपालमा प्रदर्शनको तेश्रो हप्तामा प्रवेश गरेको छ । यो अवधिमा फिल्मले ७ करोडको व्यापार गरेको निर्माण युनिटले जनाएको छ । सुरुदेखी नै उल्लेख्य दर्शकको साथ पाईरहेको फिल्म दिमाग खराब युनिटले नेपाली फिल्महरुमा हल संचालकबाट भैरहेको भेदभावपुर्ण व्यवहारको विरुद्धमा आवाज उठायो ।

एकसाता अघि फिल्मका तर्फबाट निर्देशक निस्चल बस्नेत र निर्माता रौनक विक्रम कँडेलले संयुक्तरुपमा विदेशी फिल्म र नेपाली फिल्मलाई बराबर शो सङ्ख्या र शेयर बाँडफाँड नगरेसम्म नेपालमा आफ्नो फिल्म ‘दिमाग खराब’ प्रदर्शन रोक्ने निर्णय गर्यो । युनिटले यतिमात्रै हैन पहिलो र दोस्रो हप्ता निर्माता र हल सञ्चालकमा हुने शेयर बाँडफाँड ५०-५० प्रतिशत हुने तर, तेस्रो हप्तादेखि निर्मातालाई ३५% र प्रदर्शकलाई ६५% शेयर बाँडिने प्रथा हटाई तेस्रो हप्तादेखि पनि शेयर बाँडफाँडमा ५०-५० प्रतिशत हुनुपर्ने माग राखेका थिए ।

दिमाग खराब टिमको जुन निर्णयले नेपालि फिल्म उधोगमा एककिसिमको तरङ्ग नै पैदा भयो । त्यसपस्चात नेपाल चलचित्र निर्माता संघले सो निर्णयलाई समर्थन गर्यो र नेपाल चलचित्र संघसंग वार्ता टोलि नै बनाएर छलफलमा बसेका थिए । मंगलबाट रातीसम्म दिमाग खराब फिल्मको शो थिएन । आन्दोलनमा रहेका कारण निर्माताले शो रोकेर बार्तामा बसेका थिए । तर मंगलबार बसेको वार्ता टोलिले तेस्रो हप्तापछि पनि ५०-५० प्रतिशत शेयर बाँडफाँडमा टुङ्गो लगाउन नसकेपछि वार्ता र फिल्म प्रदर्शन निरन्तर रहने भन्दै बुधबार बिहान भने दिमाग खराबको शो खुलेको थियो ।

यस्तैमा बिहिवार गरिएको छलफलबाट भने यो बिषयले टुङ्गो पाएको छ । अर्थात दिमाग खराब युनिटले उठाएको मुद्धामा सिनेमा हलहरुको छाता संगठन नेपाल चलचित्र संघ सहमतीमा आएको हो । अबदेखी सबै नेपाली फिल्मले हलमा प्रदर्शन भईन्जेल ५० प्रतिशत शेयर पाउने भएका छन् । यो निर्णयले अब फिल्म निर्मातालाई ठूलो राहत मिलेको छ । चलचित्र संघका अध्यक्ष विरेन्द्रनारायण श्रेष्ठ र चलचित्र निर्माता संघका अध्यक्ष नवल खड्काले सहमति पत्रमा हस्ताक्षर गरेका छन् ।

वार्ता टोलिमा नेपाल चलचित्र संघको तर्फबाट पूर्व अध्यक्ष राजकुमार पोखरेलको संयोजकत्वमा नरेन्द्र महर्जन, गोपालकाजी कायस्थ, सुरेन्द्र थापा र प्रज्वल राणा थिए भने निर्माता संघको तर्फबाट पूर्व महासचिव तथा सल्लाहकार अशोक शर्माको संयोजकत्वमा उदयकुमार इङ्नाम, दीपकराज गिरी, खगेन्द्रप्रसाद लामिछाने, रामबाबु गुरुङ, रवीन्द्रसिंह बानियाँ र कृषा चौलागाईं रहेका थिए ।