ट्रेण्डिङ्गमा ४ नेपालि फिल्म: १ नम्बरमा ‘कबड्डी ४’, ‘रोमियो एण्ड मुना’लाई जित्यो ‘छड्के २’ ले

इटहरी/ सिनेमा हलमा झैँ युट्युब पनि फिल्मको प्रतिष्पर्धा हुन्छ । सिनेमा हलमा सार्वजनिक भैसकेपछि युट्युबमा अपलोड हुने फिल्महरुको प्रतिष्पर्धा रोचक हुन्छ । अझै यो पटक युट्युब ट्रेण्डिङ्ग हेर्न लायक नै छ । युट्युब नेपालको ट्रेण्डिङ्गमा अहिले ४ नेपालि फिल्म छन् । यी ४ नेपालि फिल्महरुमा कुनै ब्लकबस्टर, कुनै औसत र कुनै फ्लपमा गनिएका फिल्महरु छन् । २०७५ सालमा सार्वजनिक प्रदर्शन भएको ‘रोमियो एण्ड मुना’ ५ वर्ष पछि युट्युबमा आएको छ । यो फिल्मले २ साता पार गर्नै लाग्दा युट्युबमा जम्मा १२ लाख भ्युज बटुलेको छ भने त्यो भन्दा १ दिनपछि युट्युबमा अपलोड भएको ‘छड्के २’ ले २० लाखबढी भ्युज बटुल्न सफल भएको छ ।

२०७९ सालको फागुन १९ गते ‘छड्के २’ प्रदर्शन भएको थियो । यी २ फिल्मले प्रदर्शनअघि राम्रै चर्चा बटुलेको थियो । तर सिनेमा हलमा प्रदर्शन पश्चात भने दर्शकको खडेरी लाग्यो । यतिसम्मकि छड्के २ लाई त सबैले फ्लप फिल्म नै भन्न भ्याए । अनमोल केसीको अहिलेसम्मकै फ्लप फिल्मको गन्तीमा छड्के २ निस्कियो भने अनमोलले पनि यसलाई स्वीकार गरे । यता ट्रेण्डिङ्गमै रहेको अर्को २ फिल्म हो ‘फुलबारी’ र ‘कबड्डी ४’ । यी दुवै फिल्ममा अभिनेता दयाहांग राई छन् । तर सिनेमा हलमा एउटा ब्लकबस्टर र एउटा औसत ब्यापार गरेका फिल्महरु हुन् । सिनेमा हलमा प्रदर्शनताका कबड्डी ४ ब्लकबस्टर भएको थियो भने फुलबारी औसतमै सिमित भएको थियो ।

अहिले यी २ फिल्म ११ दिनको अन्तरमा युट्युबमा सार्वजनिक भएको छ । जोडतोडले ट्रेण्डिङ्गको पहिलो स्थान ताक्दै अघि बढिरहेको ‘फुलबारी’ जब ‘कबड्डी ४’ आयो तबदेखि ट्रेण्डिङ्गमा ओरालो लाग्न थालेको छ । फूलबारीलाई उकालो लाग्न क्रिकेटका भिडियोहरु समेत बाधक बनिरहेको छ । यता ‘कबड्डी ४ : द फाइनल म्याच’ युट्युबमा रिलिज भएको २ दिनमै ट्रेण्डिङ्गको पहिलो नम्बरमा पुगेको छ । यो समाचार तयार गर्दै गर्दा ३३ लाखबढी पटक कबड्डी ४ लाई हेरिएको छ । यो भन्दा अगाडि सार्वजनिक भएर ट्रेण्डिङ्गमै रहेको फुलबारीले सार्वजनिकको १३ दिन पुग्दैगर्दा ६७ लाख बढि भ्युज पाएको छ ।

यसर्थ कबड्डी ४ ले २ दिनको अवधिमै झन्डै फुलबारीको आधा भ्युज बटुलेको छ । यी दुवै फिल्मलाई रामबाबु गुरुङ्गले निर्देशन गरेका हुन् । कबड्डी ४ र फुलबारीले हल प्रदर्शनको आ-आफ्नो साख भ्युज र ट्ट्रेण्डिङ्गका आधारमा जोगाईरहेको छ भने रोमियो एण्ड मुना र छड्के २ ले भने आ-आफ्नो साख बिर्सिएको छ, अर्थात भलै फिल्मले सन्तोषजनक आम्दानि नगरेतपनि हरेक पक्षबाट छड्के २ भन्दा रोमियो एण्ड मुनाको चर्चा माथि थियो । यसरि हेर्दा युट्युब ट्रेण्डिङ्ग र भ्युजमा भने छड्के २ माथि देखिएको छ ।