पिफ्टले पैसा अभावमा थन्किएका स्क्रिप्टमा लघु, डकुमेन्ट्री र फिचर फिल्म नि:शुल्क निर्माण गर्दिने

इटहरी/ नेपाली चलचित्र क्षेत्रको उर्वर भुमी हो पुर्व अर्थात कोशी प्रदेश । यहाँ पछिल्लो समय चलचित्र क्षेत्र चलायमान देखिन्छ । यहाँ निर्माण भएका फिल्म प्रदर्शन, प्रिमियर देखी छायांकन संगै ठूलो बजेटमा बन्ने कमर्सियल फिल्महरु पनि कोशी प्रदेशमा छायांकन भैरहेका छन् । यस्तैमा यहि ठाउँमा अवसर छ र त्यसको उपयोग गर्न सकिन्छ भन्ने उद्देश्य सहित कोशी प्रदेशको केन्द्र मानिने इटहरीमा स्थापना भएको पुर्वान्चल इन्स्टिच्युट अफ फिल्म एण्ड टेलिभिजनले पैसा अभावमा आफ्नो कला दर्शक माझ ल्याउन नसकिरहेका कथा तथा स्कृप्ट लेखकहरुलाई अवसर प्रदान गर्ने भएको छ ।

यो क्षेत्रमा इच्छा देखाएर केही गर्ने र बन्ने सोच भएकाहरुले सम्पर्क गर्न इन्स्टिच्युटका संचालक रोनिश राउतले बताए । उनका अनुसार आदिवासी जनजाती तथा पिछडिएका वर्गहरुको कथालाई प्रमुख प्राथमिकता दिइने छ । कथाको प्रकार र आकार हेरेर लघु फिल्म, डकुमेन्ट्री फिल्म तथा फिचर फिल्मको रुपमा निर्माण गरिनेछ । जसको लागी प्रोडक्सनको सम्पुर्ण काम इन्स्टिच्युटले नि:शुल्क गर्ने संचालक राउतले जानकारी गराए ।

उक्त फिल्म निर्माण पश्चात् विभिन्न ठाउँमा च्यारिटी शो गर्ने तथा विभिन्न फिल्म फेस्टिभलहरुमा सहभागी गराउन सहयोग गर्दिने उनको योजना रहेको छ । इन्स्टिच्युटले होस्टलको सुविधा सहित अभिनय, निर्देशन, स्कृप्ट राइटिङ लगायत फिल्म निर्माणमा आवस्यक पर्ने महत्त्वपूर्ण विधाहरुमा अनुभवी प्रशिक्षक मार्फत कक्षाहरु संचालन गरिरहेको छ । यो क्षेत्रमा भविष्य बनाउन इच्छुकले फिल्म पढ्नलाई काठमाडौ वा मुम्बई नै पुग्नुपर्छ भन्ने भ्रम तोड्नलाई इन्स्टिच्युटले उदाहरणीय काम गरिरहेको छ ।