इटहरी/ अभिनेता अनमोल केसी उनले खेकेको फिल्म भन्दा छाडेका फिल्मका कारण चर्चामा छन् । गएको साता उनले छाडेका फिल्मको लिस्ट भनेका थियौ । अहिले उनले छाडेको अन्तिम फिल्म ‘रामायण’को विवाद चर्किएको छ । सामाजिक संजालमा चलचित्रकर्मीहरु विभाजित भै पक्ष र विपक्षमा बोलिरहेका छन् । रामायण छाडेपछि अनमोल २ दिन निर्मात्री सुप्रीया कटुवालको उजुरीको आधारमा प्रहरी नियन्त्रणमा रहे । हालै उनी नियन्त्रण मुक्त भएका छन् । तर, यो इस्यु भने सेलाएको छैन् । यता बोल्न पर्ने संघसंस्थाहरु अहिलेसम्म पनि चुइक्क बोलेको छैन ।
नत कलाकारको हकहितका लागी भन्दै खुलेको कलाकार संघ बोल्यो, नत निर्माता निर्देशकको हकहितका लागी भन्दै खुलेका निर्माता र निर्देशकहरुका संघ बोल्यो । अनमोलले छाडेपनि यो फिल्म त बन्ला तर निर्धारित समयमा फिल्म फ्लोरमा जान सकेको छैन । यता प्राविधिकहरुले पनि पेस्की पाईसकेका थिए रे । न त उनिहरुका हकहितमा काम गर्ने भन्दै खुलेका संघसंस्था बोल्यो । संघसंस्था सबै चुपचाप । तर, सामाजिक संजालमा जो जति बोलिरहेका छन्, उनिहरुमा कुनै निचोड भने छैन । मात्रै आरोप प्रत्यारोप । क-कस्ले के बोलिरहेका छन्, त्यो त तपाइहरुले देखि नै रहनु भएको छ ।
यता अनमोल छुटेपछी फिल्मका निर्देशक सुदर्शन थापाले सामाजिक संजालमा एक लामो स्ट्याटस लेख्दै ‘मोटो पारिश्रमिकको माग गर्नुभन्दा पहिला आफुलाई पुर्णतया तयार गर्न’ भनेका छन् । कलाकारलाई स्कृप्ट चित्त बुझेन, कागजी तथा कानुनी सम्झौता पनि नभएका कारण छोड्यो । विश्वासमा घात गरेका कारण अनमोलको पनि गल्ती त छ नै । तर, सुरुमा पुर्ण स्कृप्ट नै नदेखाई कलाकारलाई मोटो रकम माग्यो भन्दैमा दिएर अहिले चाहिँ पुर्णतया तयार हुनु भन्न मिल्ला र ? अनमोलले त पुर्ण तयारीको लागी समय पनि मागेकै हो । यता फिल्मकी निर्मात्रीले पनि सामाजिक संजालमै लामो स्ट्याटस लेखिन् । उनले मीठो बोलिले फसाउने नियत स्पष्ट रहेछ’ भनेर लेखिन् । तर हतार गर्नाले यो अवस्थाको सिर्जना भएको बुझ्न सकिन्छ ।
ठूलो प्रोजेक्टमा काम गर्दा साथिभाई, नातागोता, भाइभतिजा भन्दै मौखिक सहमतिमा काम गर्दा नमज्जाले पछारिन सकिन्छ भन्ने उदाहरण यो घटनाले देखाएको छ । यता अभिनेत्री पुजा शर्माले पनि यो घटनाको बारेमा बोलेकी छन् । यो फिल्म रामायणलाई सबैभन्दा पहिला अभिनेत्री पुजा शर्माले निर्माण गर्ने भएकी थिइन् । यतिसम्म कि उनले पाथिभरा देवीको दर्शन गर्दै फिल्मको स्कृप्ट पुजा गरेसंगै निर्देशकको रुपमा सुदर्शन थापालाई र नायकको रुपमा अनमोल केसीलाई अनुबन्ध गर्दै पेश्की रकम समेत दिएकी थिइन् । तर, अनमोलले पेश्की बापत लिएको १० लाख रकम फिर्ता गर्दै यो फिल्म छाडेपछि फिल्म निर्माणमा अन्यौलता छाएको थियो ।
यता पुजालाई खबरै नगरी सुदर्शन थापाले चलचित्र विकास बोर्डमा निर्मात्रीमा आफ्नी श्रीमती सुप्रीया थापालाई अघि सार्दै सोही कथा र नाममा फिल्म दर्ता गराए । अहिले सोही फिल्म केसीले पुनः छोडेपछि पुजाले ‘अर्कोतिर भीड छ भन्दैमा सत्य मर्दैन । अझै प्रमाण सहित निर्माणपक्ष ठगिएको वा धोका पाएको देख्दा पनि बोलेन भने अन्याय नै हुन्छ । यो भोली जसलाई पनि पर्न सक्छ । कुराले मात्रै होइन व्यवहारले प्रोड्यूसर बचाऔं । कोही पनि अन्यायमा नपरोस् । जय नेपाली सिनेमा ।’ भन्दै लेखेकी छन् । अब यो एक बिषय भित्रका अनेक लफडाले कहिले टुङ्गो पाउला ? त्यो पर्ख र हेरको अवस्थामा छ ।
Discussion about this post