इटहरी/ लोकप्रिय गायक प्रकाश सपुतको डेब्यु अभिनय रहेको फिल्म ‘परदेशी २’ को यतिबेला देशव्यापी प्रचारप्रसार चलिरहेको छ । चर्चासँगै प्रचार प्रसारमा होमिएको ‘परदेशी २’को टिमले आइतबार नेपालगन्जमा पत्रकारहरुसँग साक्षात्कार गरेको छ । फिल्मको प्रचारप्रसार नयाँ शैलीमा गरिरहेको यो टिम पुर्व (कोशी प्रदेश) पनि आउने तयारीमा रहेको जानकारी प्राप्त भएको छ । नाटकका माध्यमबाट फिल्मको प्रचारलाई तिब्रता दिइएको फिल्म यहि असोज २६ गतेदेखी देशभरका सिनेमाहलमा प्रदर्शन हुँदैछ ।
फिल्मका प्रमुख कलाकारहरु सहित देशका विभिन्न मुख्य शहर पुग्दै ‘परदेशी २’ फिल्म युनिटले फिल्मबारे जानकारी दिँदै हिडिरहेको छ । यसै क्रममा शनिबार चितवन हुँदै नेपालगन्ज पुगेको हो । नेपालगन्जमा रहेको रोयल र क्युएफएक्स सिनेमा हलमा उपस्थित दर्शकलाई परदेशी २ को ट्रेलर देखाउदै फिल्मका मुख्य कलाकारद्वय प्रकाश सपुत, केकि अधिकारी र निर्देशक नारायण रायमाझीले आफुहरुले निर्माण गरेको फिल्म हेर्न आग्रह गरे ।
यस्तै फिल्म युनिटले आज नेपालगन्जका विभिन्न स्कुलहरुमा फिल्मको प्रचारप्रसार सामग्रीको रुपमा युनिटले तयार गरेको नाटक प्रस्तुत गरेको छ । उक्त प्रस्तुतिलाई सम्बन्धित स्कुलका विद्यार्थीहरुले मन पराएको र फिल्म हेर्ने संगै ‘परदेशी २’ को प्रचारप्रसारलाई सहयोग गर्ने भनिएको निर्माण युनिटले सुनाए । नारायण इन्टरनेसनलको ब्यानरमा निर्माण भएको फिल्म परदेशी २ लाई फिल्मका निर्देशक रायमाझी र राजेश बंशल ‘अग्रवाल’ले संयुक्त रुपमा निर्माण गरेका हुन् । चलचित्र ‘परदेशी २’मा प्रकाश र केकिका अलावा वर्षा शिवाकोटी, दिलिप रायमाझी, प्रशान्त तामांग, नीर शाह, रमा थपलिया, सविन बास्तोला, देवेन्द्र बब्लु र रोशनी कार्कीलगायतको अभिनय रहेको छ ।
Discussion about this post